Ստորագրվեց կանանց բռնությունից պաշտպանելու հռչակագիրը

ՄԱԿ-ի անդամ երկրները, այդ թվում` պահպանողական կաթոլիկ և մահմեդական երկրների ներկայացուցիչները, համաձայնեցրել են կանանց բռնություններից պաշտպանելու վերաբերյալ հռչակագիրը. հաղորդում է Associated Press-ը:

Ստորագրված հռչակագրի համաձայն` բոլոր երկրները պետք է ձեռնպահ մնան, իրենց ավանդույթներին, սովորույթներին և կրոնական սկզբունքներին հղում կատարելով, կանանց նկատմամբ բռնություններն արդարացնելուց: Միաժամանակ, հռչակագիրը պաշտպանում է սեռերի հավասարության սկզբունքը, ինչպես նաև ՄԱԿ-ի անդամ երկրներին կոչ է անում դպրոցներում խթանել երեխաների սեռական դաստիարակությունը, բռնության զոհերի համար օգնության համակարգ ստեղծել և խստորեն պատժել գենդերային նկատառումներով կատարված հանցագործությունները: