Կոչ` Կոնգրեսին` ավելացնել օգնությունը Հայաստանին, Արցախին եւ Ջավախքին

ՀՅԴ Ամերիկայի Հայ Դատի հանձնախմբի օրենսդրական հարցերով տնօրեն Րաֆֆի Կարակաշյանը ԱՄՆ Կոնգրեսի Ներկայացուցիչների պալատի արտաքին հատկացումների հանձնաժողովին կոչ է արել ավելացնել Հայաստանին, Արցախին եւ Ջավախքին հատկացվող օգնությունը. տեղեկացնում է Հայ Դատի հանձնախումբը:

Հանձնաժողովում ելույթ ունենալով` Կարակաշյանը, մասնավորապես, առաջարկել է Լեռնային Ղարաբաղի զարգացման համար հատկացնել նվազագույնը 5 մլն դոլար, ինչպես անցյալ տարի, նաեւ հետեւողական լինել ԼՂՀ-ի հետ հարաբերություններ հաստատելու հարցում ու արագացնել Ղարաբաղյան հակամարտության կարգվորման բանակցային գործընթացը` ԵԱՀԿ ՄԽ շրջանակներում:

Նա նաեւ  կոչ է արել դադարեցնել Ադրբեջանին ռազմական օգնություն ցուցաբերելը, իսկ Հայաստանին նվազագույնը 50 մլն դոլար հատկացնել` տնտեսության զարգացման համար, բացի դրանից` Վրաստանին տրամադրվող օգնության 10 տոկոսն էլ փոխանցել հատուկ Ջավախքին` նպաստելով նոր աշխատատեղերի ստեղծմանը եւ աղքատության կրճատմանը: