Եթե դեմ են Արցախին, Հայ Դատին, Արևմտահայաստանի ազատագրմանը, Ջավախքին, ուրեմն դեմ են Դաշնակցությանը. Հրանտ Մարգարյան

Ինչո՞ւ պիտի ընտրենք Դաշնակցությանը, և ինչպե՞ս եք գնահատում ձեր հնարավորությունները. «Երկիր մեդիա»-ի «Հարցեր` դաշնակցականներին» հաղորդման ժամանակ քաղաքացիներից մեկն այս հարցն էր ուղղել ՀՅԴ Բյուրոյի ներկայացուցիչ Հրանտ Մարգարանին:

«Շատ են պատճառները, բայց այսօրվա իրականության մեջ երկու հիմնական պատճառ կա: Նախ` ազգայինը. այսօր մտահոգություն կա ազգային արժեհամակարգի, ազգային ծրագրերի, ազգային մտածողության, ազգային դաստիարակության, մշակույթի պահպանման, հայկականն ունենալու խնդիր: Դա մարմնացնում է Դաշնակցությունը»,- պատասխանել է Հրանտ Մարգարյանը: Նա նշել է, որ այսօրվա հակադաշնակցական արշավներին ինքը ծիծաղով է վերաբերվում:

«Իրենց այնպես են պահում, որ եթե ՀՅԴ-ն ընդհանրապես գոյություն չունենար, հակադաշնակցականությունը դեռ գոյություն կունենար, որովհետև նրանք Դաշնակցությանը դեմ չեն` որպես կուսակցություն, նրանք Դաշնակցության արժեհամակարգին են դեմ: Եթե դեմ են եկեղեցուն, ուրեմն դեմ են Դաշնակցությանը: Եթե դեմ են Արցախին, ուրեմն դեմ են Դաշնակցությանը: Եթե դեմ են Հայ Դատին, Հայոց ցեղասպանության միջազգային ճանաչմանը, Արևմտահայաստանի ազատագրմանը, ուրեմն դեմ են Դաշնակցությանը: Եթե դեմ են Ջավախքին, ուրեմն դեմ են Դաշնակցությանը: Այսքան պարզ է»,- նշել է Հրանտ Մարգարյանը` շեշտելով, որ պետք է ընտրել Դաշնակցությանը, որպեսզի ազգայինը պահպանվի:

Բյուրոյի ներկայացուցիչը նշել է, որ իրենք տարբեր դիրքորոշումներ են ունեցել, բայց երբ ազգայինը վտանգվել է, կարողացել են ըմբոստանալ, իրենք իրենց գերազանցել: Նա հիշեցրել է նաև, որ երբ հայ-թուրքական արձանագրությունների հարցը բարձրացավ, ՀՅԴ-ն գերազանցեց ինքն իրեն:

«Մենք ժամանակի ամենամեծ շարժումը սկսեցինք հայկական իրականության մեջ: Երբ Լևոն Տեր-Պետրոսյանի ժամանակ էլ Արցախի հարցով նահանջ արձանագրեցին, նույնն արեցինք»,- ասել է Հրանտ Մարգարյանը` նշելով, որ այսօր էլ կան նույն մտահոգությունները: Նրա խոսքով` առաջին հայացքից թվում է` լավ բան է տեղի ունենում: Արցախի հարցով սկզբունքային դիրքորոշումներ են հայտնվում, հաճախակի այցելություններ են լինում, թվում է` բանի պակաս չկա, Դաշնակցության տեսակետները գրեթե կրկնվում են:

«Մտածում ես` լավ է ամեն ինչ, մեկ էլ տեսնում ես` ազատագրված տարածքների հարցով կարծիք չի հայտնվում: Ասում է` դա պետք է որոշի ժողովուրդը: Միշտ էլ ժողովուրդը պիտի վերջին խոսքն ասի, բայց եթե քաղաքական ուժը չի ասում` որն է իր տեսակետը, որ դրանից հետո դնի ժողովրդի դատին, դա վտանգավոր է: Նշանակում է` երկու բևեռ կա հայկական իրականության մեջ: Մի բևեռն ասում է` ոչ մի զիջում, մյուս բևեռն ասում է` տարածքներ` խաղաղության դիմաց: Հիմա էլ հայտնվել է մեկը, ով ասում է` արի գնանք, հայտնվենք մեջտեղում, ասենք` ժողովուրդը պետք է որոշի` տարածքները տա՞նք, թե՞ չտանք, հետո կորոշենք մյուսը: Սա մտահոգիչ է: Կարող է ոչ մի բան չկա, ես չեմ ուզում ժամանակից առաջ ընկնել, բայց մթնոլորտը լեցուն է մտահոգություններով»,- ասել է Հրանտ Մարգարյանը` հավելելով, որ ազգային հարցերի, արժեքների, արժեհամակարգի խնդիր ունենք այսօր:

Ինչ վերաբերում է Դաշնակցությանն ընտրելու երկրորդ պատճառին, նա ասել է. «Երկրորդը` սոցիալական անարդարությունն է: Դաշնակցությունը ազգային կուսակցություն է, հավատացած է, որ մենք ազգային պայքար ունենք, ազգային հեռանկար ունենք: Հավատացած է, որ մենք ազգային երազանք ունենք , մեր ժողովուրդը պետք է համախմբված լինի մեր պետականության շուրջ: Իսկ որպեսզի մեր ժողովուրդը համախմբված լինի մեր պետականության շուրջ, և մենք կարողանանք միասնաբար այս պայքարն առաջ տանել, պետք է սոցիալական արդարություն լինի, մեր ժողովրդի մեջ աղքատություն չպետք է լինի, հայ մարդը չպետք է աղքատ լինի: Սա մեր համոզումն է, էությունը, և սա չի բխում միայն մեր սոցիալիզմից: Մեր սոցիալիզմը բխում է մեր ազգային իրողությունից: Մեր ազգը պետք է կարողանա միասնական լինել, իսկ դրա համար պետք է նրա մեջ արդարություն հաստատված լինի: Որպեսզի արդարություն հաստատվի, պետք է աղքատ չլինի, ճնշում չլինի, զրկանք չլինի, անգործ մարդ չլինի: Սրանք մեզ համար ծրագրեր են, մենք ծրագիր ունենք: Բոլոր մյուս ուժերը լիբերալ համակարգի կողմնակից են, անցյալի ուժերն էլ են այդպես, ներկայինն էլ, ապագայի մասին խոսողներն էլ լիբերալ համակարգի կողմնակից են: Իսկ մենք` ոչ, մենք ասում ենք սոցիալական տնտեսական համակարգ պետք է ստեղծվի երկրում: Այն, ինչ Սահմանադրությունն է ասում, բայց մոռացվում է»,- եզրափակել է Հրանտ Մարգարյանը: