Գյումրեցի ընտրողներին պատիվ են տվել ''Փարվանա''-ում

Yerkir.am-ը, հղում անելով Գյումրիի ԳԱԼԱ հեռուստաընկերությանը, արդեն տեղեկացրել է, որ ԱԺ պատգամավոր Սամվել Ալեքսանյանի` Ախուրյանում գտնվող շաքարի գործարանի աշխատակիցներին ավտոբուսներով բերում են Երևան` քվեարկելու:

Մայրաքաղաքի մուտքի մոտ ԳԱԼԱ-ի նկարահանող խումբը դիմավորել է գյումրեցի ընտրողներին: Միկրոավտոբուսները նախ մայրաքաղաքում մի քանի պտույտ են գործել, ապա մեկ այլ` արտասահմանյան արտադրության ավտոմեքենայի ուղեկցությամբ, ուղեւորվել են Ալեքսանյանին պատկանող «Փարվանա» ռեստորանային համալիր: Գյումրեցի ընտրողները դուրս են եկել մեքենաներից եւ մտել ռեստորանային համալիր:

ԳԱԼԱ-ի լրագրողը, ներկայանալով որպես հաճախորդ, ներս է մտել ռեստորան եւ ականատես եղել ներսում տեղի ունեցող զարգացումներին: Գյումրեցի ընտրողները նստած են եղել սեղանի շուրջ, նրանց համար հյուրասիրություն էր կազմակերպվել: Մի հատվածում էլ հավաքված են եղել մոտ 10 հոգի, ովքեր, ըստ երևույթին, Գյումրիից մայրաքաղաք եկած ընտրողների հսկիչներն էին. նրանց ձեռքում ցուցակներ էին: Նրանք մեկ առ մեկ հրավիրում էին ընտրողներին, մեկ անգամ եւս ներկա-բացակա անում: