Բացահայտեցինք, որ վերեւում Աստված կա

Քարոզարշավի ընթացքը շատ օգտակար էր մեզ համար, քանի որ մի շարք բացահայտումներ արեցինք,օրինակ` իմացանք, որ վերեւում Աստված կա. լրագրողների հետ հանդիպման ժամանակ նշեց Հովհաննես Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը: Ըստ նրա` հիմարությունների ծավալը մի քիչ շատ էր վերջին մեկ ամսում:

Բաբայանի կարծիքով` մենք արժանի էինք այն թեկնածուներին, իսկ նրանք, ովքեր չունեցան իրենց թեկնածուն, նրանք էլ այդ «բախտին» էին արժանի:

«Է, հույս չկապեիք այս թեկնածուների հետ, մենք էլ չէինք ունենա նման թեկնածուներ: Եթե հասարակության մեջ կա պահանջ` ծաղրածու ունենալու, ունեցանք: Մեր հասարակությունը շատ բազմաշերտ է, եւ պետք է հասկանալ, որ մենք միայն տաղանդներ չենք ծնում»,- ասաց Բաբայանը` հավելելով, որ քարոզարշավի ընթացքում իր ամենասիրելի օրը ընտրություններին նախորդող լռության օրն է: