Ինչպես կքվեարկի Ծառուկյանի խնամին. ՛՛Հրապարակ՛՛

ԲՀԿ ներկայացուցիչ, Գագիկ Ծառուկյանի խնամի, Աբովյանի քաղաքապետի հայր, ԱԺ պատգամավոր Մուրադ Գուլոյանից «Հրապարակ»-ը փորձել է ճշտել՝ ո՞ւմ է ընտրելու նախագահական ընտրություններին: Երկար լռությունից հետո նա ասել է. «Մեր քաղխորհուրդը որոշումը կայացրել է, իմ կարծիքով, դուք այդ մասին գիտեք, ես քվեարկելու եմ մեր քաղխորհրդի որոշման համաձայն»: Այսինքն` ինչպես Ձեր որդի՞ն: «Այո»: Բայց ասում են, որ նա աշխատում է Սերժ Սարգսյանի համար, մնացածներին կոչ է անում քվեարկել նրա օգտին, համ էլ կազմուպատրաստ դիմավորել էր Սերժ Սարգսյանին: «Ինքը պետական աշխատող է, մոռանո՞ւմ եք դա»: Իսկ կարմիր գորգն ո՞վ էր փռել Սերժ Սարգսյանի ոտքերի տակ, ի՞նչ եք կարծում: «Երեւի Հանրապետականը»: Առանց քաղաքապետի գիտությա՞ն. չէ՞ որ բոլորը նրան «կկասկածեին»: «Միգուցե»: