Ինչո՞ւ Հայրիկյանը հետ վերցրեց դիմումը

ՀՀ նախագահի թեկնածու Պարույր Հայրիկյանի փաստաբան Լեւոն Բաղդասարյանը Yerkir.am-ի հետ զրույցում տեղեկացրեց, որ 12:30-ի սահմաններում Պարույր Հայրիկյանի անունից ՍԴ-ից խնդրել է հետ կանչել ընտրությունները երկու շաբաթով հետաձգելու մասին դիմումը: Թե ո՞րն է եղել դիմումը հետ վերցնելու պատճառը, Հայրիկյանի փաստաբանը չգիտեր: Նա մեր թղթակցի հետ զրույցում հայտնեց, որ կարող է պատասխանել միայն խնդրի իրավաբանական հարցերին, իսկ քաղաքական պատճառը Հայրիկյանից չի հարցրել:

«Ես կարող եմ իմ սուբյեկտիվ կարծիքն ասել` որպես ՀՀ քաղաքացի: Նժարին դրված էր երկու խնդիր` Պարույր Հայրիկյան քաղաքական գործիչ, 80-ականների ազատության մարտիկ եւ նժարի մյուս կողմին` նախագահի թեկնածու Պարույր Հայրիկյան: Կարծում եմ` հաղթեց քաղաքական գործիչ Պարույր Հայրիկյանը, որի համար ավելի վեհ գաղափարներ կան, քան այս ընտրարշավն է»,- հայտարարեց Հայրիկյանի փաստաբանը:

Նա կարծում է, որ Հայրիկյանը կշարունակի քարոզարշավը:

Ի դեպ, մեզ դեռ չի հաջողվում պարզել, թե ինչու է Հայրիկյանը հետ վերցնում դիմումը: Ո'չ  նրա շտաբի պետ, ո'չ էլ անդամները չեն կարողանում հարցին պատասխանել: Հայրիկյանի հեռախոսն էլ անջատված է:

Հիշեցնենք, որ ՍԴ դիմելուց հետո լրագրողների հետ զրույցում Հայրիկյանը հայտարարել էր, որ մի դեպքում` մեկ միասնական թեկնածուի ձեւավորման դեպքում, հետ կվերցնի դիմումը: