Ի՞նչ է արել ԱԱԾ-ն` Հայրիկյանի գործը բացահայտելու համար

ԱԺ այսօրվա նիստում ԱԺ ՀԱԿ խմբակցության պատգամավոր Նիկոլ Փաշինյանը ԱԱԾ պետի տեղակալ Ռոմիկ Հարությունյանից հետաքրքրվեց, թե ի՞նչ ընթացքում է Պարույր Հայրիկյանի դեմ կատարված մահափորձի գործը: Հարությունը հայտարարեց, որ ԱԱԾ-ն անում է ամեն ինչ, որ այդ գործը շուտափույթ բացահայտվի: «Այլ բան չունեմ այս պահին ասելու»,- հավելեց նա:

Նիկոլ Փաշինյանն, իր հերթին, ընդգծեց, որ տաք հետքերով հանցագործությունը բացահայտելը գործնականում շատ ավելի հեշտ է, եւ հիմա հանրության մեջ մեծանում, խորանում է  մտավախությունը, որ սա դառնալու է հերթական չբացահայտված հանցագործությունը, որն ավելի է ծանրացնելու երկրում ստեղծված ծանր մթնոլորտը:

«Դուք ասացիք մեկ պարզ նախադասություն, եւ կարծում եմ` հանրությունն իրավունք ունի իմանալու, թե նախագահի թեկնածուների անվտանգությունը ձախողած պետական մարմինը որքանո՞վ գոնե կարող է հույսեր ներշնչել` հանցագործությունը բացահայտելու տեսանկյունից»,- հայտարարեց Նիկոլ Փաշինյանը: