ՕԵԿ-ը ՀՀԿ-ին փողով չի՞ օգնել

Պարզվում է` ՀՀԿ կոալիցիոն գործընկեր ՕԵԿ-ն էլ է ՀՀԿ նախագահի թեկնածուի համար քարոզարշավ անում: Այս մասին լրագրողների հետ հանդիպման ժամանակ, ի պատասխան Yerkir.am-ի հարցի, հայտարարեց ԱԺ ՕԵԿ խմբակցության քարտուղար Մհեր Շահգելդյանը եւ հիշեցրեց, որ ՕԵԿ-ն էլ նախընտրական շտաբ ունի, որի պետը Խաչիկ Հարությունյանն է: Նա հայտարարեց, որ քարոզարշավն իրականացվում է ՕԵԿ նախագահ Արթուր Բաղդասարյանի մասնակցությամբ:

«Մենք իրականացնում ենք երկու տիպի աշխատանք` մեկը`  պարոն Բաղդասարյանի կողմից իրականացվելիք հանդիպումներն են Երեւանում եւ մարզերում: Շատ ակտիվ քարոզչություն ենք անում: Երկրորդ` ակտիվորեն աշխատում են մեր տարածքային կազմակերպությունները, որոնք զբաղվում են կազմակերպչական աշխատանքներով, ինչը միշտ մեզ հատուկ է եղել»,- հայտարարեց ՕԵԿ-ական պատգամավորը:

Նա վստահեցրեց, որ այս քարոզարշավը մեր երկրի եւ պետության համար էլ է խիստ կարեւոր: Ըստ Շահգելդյանի` մենք իսկապես շատ լավ ընտրություններ անցկացնելու շանս ունենք: 

Մեր հարցին, թե ՕԵԿ-ը ֆինանսական աջակցություն ցուցաբերե՞լ է կոալիցիոն գործընկերոջը քարոզարշավի ծախսերի հարցում, Շահգալդյանը հայտարարեց. «Ի՞նչ ֆինանսների մասին է խոսքը, նման բան չկա, քարոզարշավը մենք իրականացնում ենք մեր հնարավորություններով եւ մեր ռեսուրսներով»:

Ի դեպ, Մհեր Շահգելդյանը խոստացել է Yerkir.am-ին տրամադրել իրենց հանդիպումների գրաֆիկը: Այնպես որ` առաջիկայում կլուսաբանենք, թե ինչպես է Սերժ Սարգսյանի համար քարոզարշավ իրականացնում կոալիցիոն գործընկերը: