Հարկայինի աշխատողները կհամալրեն գործազուրկների բանակը. ''Ժողովուրդ''

«Ժողովուրդ»-ը տեղեկացել է, որ շատ շուտով Հայաստանի տարբեր քաղաքներում գործունեություն ծավալող հարկային մարմինները կփակվեն: Փոխարենը կլինի մեկ միասնական գերատեսչություն, որը կտեղակայվի Հայաստանի մարզկենտրոններում:

ՀՀ պետական եկամուտների կոմիտեի հասարակայնության հետ կապերի եւ լրատվության վարչության ղեկավար Նելլի Մանուչարյանը հաստատել է «Ժողովուրդ»-ի տեղեկությունը` նշելով, որ այդ գործընթացը շարունակվում է:

«Բարեփոխումների ծրագրով նախատեսվում է օպտիմալացումը շարունակել 2013-2014թթ. ընթացքում: Անձնավորված հաշվառման համակարգի ներդրումից հետո 1-ին եռամսյակի արդյունքներով կքննարկվեն եւ ՀՀ կառավարությանը կներկայացվեն 2013թ. ընթացքում վերակազմավորման ենթակա հարկային տեսչությունները: Նախնական գնահատականներովՙ այն կվերաμերի 4-6 հարկային տեսչությունների, որոնց մասին լրացուցիչ կիրազեկվի»,- թերթին հայտնել է նա:

Այսպիսով, ամփոփում է «Ժողովուրդ»-ը, ՀՀ-ում գործազուրկները կշատանան: