Թուրքիայում բողոքի ակցիաներ են անցկացվել Patriot հրթիռների դեմ

Թուրքիայում ձախերն ու ազգայնականները բողոքի ակցիաներ են անցկացվել ՆԱՏՕ-ական Patriot հրթիռների տեղակայման դեմ. տեղեկացնում է Reuters գործակալությունը:

Երբ հունվարի 21-ին հակահրթիռային համակարգերը տեղափոխող գերմանական նավերը կառանել են միջերկրածովյան Իսկանդերուն նավահանգստում, Թուրքիայի Կոմունիստական կուսակցության մոտ 150 կողմնակիցներ այնտեղ այրել են ԱՄՆ դրոշը: Նույն օրը հազարավոր մարդիկ հանրահավաքի են դուրս եկել Իսկանդերունի կենտրոնում` «Ամերիկա', մարդասպա'ն, հեռացիր Մերձավոր Արեւելքից», «Իսկանդերունը կդառնա ՆԱՏՕ-ի գերեզմանը» պաստառներով: Ցուցարարների խոսքերով` իրենց խնդիրը Սիրիան չէ, այլ իրենց` թշնամու հետ համագործակցող կառավարությունը:

Ոստիկանությունը ձերբակալել է մի քանի ցուցարարի: