Մեքսիկայում զանգվածային բողոքի ակցիաներ են անցկացվել 130 000 մարդու անհետացման կապակցությամբ

Հազարավոր մարդիկ Մեքսիկայի տարբեր հատվածներում բողոքի ակցիաներ են անցկացրել՝ ուշադրություն հրավիրելով երկրում բռնի անհետացումների բազմաթիվ դեպքերի վրա և պահանջելով պաշտոնյաներից ավելի ակտիվ քայլեր իրականացնել դրանց դեմ պայքարում, հաղորդում է BBC News-ը։

Անհետացածների հարազատներն ու ընկերները, ինչպես նաև մարդու իրավունքների պաշտպանները երթով անցել են Մեխիկոյի, Գվադալախարայի, Կորդովայի և այլ քաղաքների փողոցներով՝ պահանջելով արդարություն և կոչ անելով նախագահ Կլաուդիա Շեյնբաումի կառավարությանը օգնել գտնել իրենց անհետացած հարազատներին։

Մեքսիկայում ավելի քան 130 000 մարդ համարվում է անհետացած։ Գրեթե բոլոր դեպքերը տեղի են ունեցել 2007 թվականից հետո, երբ այն ժամանակվա նախագահ Ֆելիպե Կալդերոնը սկսեց «պատերազմը թմրանյութերի դեմ»։

Շատ դեպքերում անհետացածները բռնությամբ ներգրավվել են թմրակարտելների մեջ կամ սպանվել են դիմադրության համար։

Թմրակարտելներն ու կազմակերպված հանցավոր խմբավորումները համարվում են հիմնական մեղավորները, սակայն մահերի և անհետացումների մեջ մեղադրանքներ կան նաև անվտանգության ուժերի հասցեին։

Ցույցերի անցկացումը բազմաթիվ քաղաքներում, նահանգներում և համայնքներում ցույց է տալիս, թե որքան խորն է բռնի անհետացումների խնդիրը ազդում Մեքսիկայի բնակչության վրա։

Երկրի մի ծայրից մյուսը՝ հարավային նահանգներից, ինչպիսին է Օախական, մինչև հյուսիսային՝ Սոնորա և Դուրանգո, հազարավոր ակտիվիստներ և անհետացածների ընտանիքների անդամներ դուրս են եկել փողոց՝ իրենց հարազատների դիմանկարներով, պաստառներով՝ իշխանություններից պահանջելով ավելի վճռական քայլեր խնդրի լուծման ուղղությամբ։