Կրթաթոշակների համար կառավարությունը հատկացրել է 60 մլն դրամ

ՀՀ կառավարությունը կրթաթոշակ տրամադրելու նպատակով Հայաստանի երիտասարդական հիմնադրամին հատկացրել է 60 մլն դրամ, որի շրջանակում հայտարարվել է մրցույթ:

Մրցույթին կարող են մասնակցել պետական բուհերի առկա ուսուցման առաջին և երկրորդ կուրսերի` անվճար համակարգում չընդգրկված ուսանողները։

Հայտատու ուսանողը պետք է բավարարի նշված պահանջներից առնվազն մեկին՝

1. սոցիալապես անապահով (ընտանիքի անապահովության սահմանային միավորից բարձր միավոր ունեցող) ընտանիքների անդամ,

2. միակողմանի ծնողազուրկ ուսանող,

3. երրորդ խմբի հաշմանդամ ուսանող,

4. հեռավոր լեռնային և սահմանամերձ գյուղերի ուսանող,

5. տվյալ ուսումնական տարվա կիսամյակի քննությունների և ստուգարքների արդյունքներով առավել բարձր գնահատականներ ունեցող ուսանող,

6. հասարակական ակտիվություն ցուցաբերող ուսանող,

7. պատշաճ վարքագիծ դրսևորող ուսանող:

Դիմում-հայտերի ընդունման վերջնաժամկետը փետրվարի 1-ն է։ Կրթաթոշակի տրամադրման մասին այլ մանրամասների կարելի է ծանոթանալ ՀԵՀ-ի պաշտոնական կայքում (http://heh.am):