Կառավարությունը մարզերին 532 մլն դրամ հատկացրեց. ամենաշատը բաժին հասավ Տավուշի մարզին՝ 132 մլն դրամ

ՀՀ կառավարությունն իր այսօրվա՝ նոյեմբերի 4-ի նիստում որոշեց սուբվենցիոն ծրագրերի իրականացման նպատակով ՀՀ Արագածոտնի, Արարատի, Արմավիրի, Գեղարքունիքի, Կոտայքի, Լոռու, Շիրակի, Վայոց ձորի և Տավուշի մարզպետարաններին գումար հատկացնել:

Տարածքային կառավարման եւ ենթակառուցվածքների նախարար Գնել Սանոսյանը նշեց, որ 24 համայնքներից ստացված 27 սուբվենցիոն ծրագրերի շինաշխատանքները եւ գույքի ձեռք բերման գործընթացներն ավարտվել են, ընդհանուր գումարը կազմում է 1,6 մլրդ դրամ, որից պետական բյուջեի  ֆինանսավորումը 532 մլն դրամ է: Այսպիսով՝ կարիք է առաջացել պետական բյուջեից հատկացնելու 532 մլն դրամ:

Ըստ նախարարի ներկայացման՝ ծրագրերից 5-ը 2020 թվականին է հաստատվել, 22-ը՝ 2021 թվականին:

«Այսպիսով՝ կարիք է առաջացել ՀՀ պետական բյուջեից մարզպետարաններին հատկացնել 532 մլն դրամ՝ շինարարական ընկերություններին ֆինասավորելու համար»,- ասաց Սանոսյանը և թվարկեց, թե որ մարզին ինչքան գումար կհատկացվի։

Ըստ նախարարի՝ Արագածոտնի մարզպետարանին կհատկացվի 27.9 մլն դրամ,  Արարատին՝ 34 մլն, Արմավիրին՝ 25 մլն,  Գեղարքունիքին՝ 112 մլն, Լոռու մարզպետարանին՝ 102 մլն, Կոտայքին՝ 28 մլն, Շիրակին՝ 30 մլն, Վայեց ձորին՝ 38 մլն և  Տավուշի մարզպետարանին՝ 132 մլն դրամ:

Նիկոլ Փաշինյանը սկսեց ներկայացնել վերջին երեք տարում իրականացված սուբվենցիոն ծրագրերը և նշեց, որ 2018-20 թթ. սուբվենցիոն ծրագրերով իարկանացվել է 1193 ծրագիր՝ ավելի քան 47 մլրդ դրամ ներդրմամբ, իսկ 2021 թվականին ընթացքի մեջ է 678 ծրագիր՝ 48 մլրդ 400 մլն դրամի չափով: