''Բանդայի'' գործով 3 տուժողներ բերման կենթարկվեն

Մի շարք անվանի անձանց տներ թալանած «բանդայի» գործով հերթական դատական նիստին չէր ներկայացել տուժողների մեծ մասը: Մասնավորապես`  Աղվան Գրիգորյանին, Երվանդ Գրիգորյանին և Անդրանիկ Գրիգորյանին դատարանը պատշաճ ծանուցագիր էր ուղարկել, ավելին` դատավոր Մխիթար Պապոյանի հանձնարարությամբ`  նիստի մեկնարկից 1 ժամ առաջ  նիստերի քարտուղարը զանգահարել էր տուժողներին և հիշեցրել նրանց ներկայության անհրաժեշտության մասին, սակայն նրանք  անորոշ պատասխաններ էին տվել` ասելով` կարող է գանք, կարող է` ոչ: Ուստի նրանց նկատմամբ դատարանը բերման ենթարկելու որոշում կայացրեց:

Տուժողներ  Նապոլեոն Ազիզյանի  և Ատոմ Բազազյանի չներկայանալու վերաբերյալ դատարանը ներկայացրեց  բժշկական փաստաթուղթ, որը կողմերը կքննարկեն հաջորդ դատական նիստի ընթացքում:  Տուժող Մելանյա Ազիզյանի ներկայացուցիչը դատարանին հայտնեց, որ  տուժողի առողջական վիճակի մասին բժշկական փաստաթուղթ կներկայացնի հաջորդ նիստին: Նրա խոսքով` Մ. Ազիզյանը  իր բնակարանի գողությունից հետո ծանր  սթրես է տարել, որից երկար ժամանակ է չի կարողանում դուրս գալ:

Մ. Պապոյանը հայտնեց նաև, որ ամբաստանյալ Սամվել Դավթյանի վերաբերյալ ստացվել է դատահոգեբուժական փորձագիտական հանձնաժողովի եզրակացությունը, ըստ որի` պարզվել է, որ մեղադրյալը չի տառապում հոգեկան հիվանդությամբ, նա էմոցիոնալ անկայունություն ախտորոշմամբ փսիխոպատ անձնավորություն է և իրավախախտումը կատարելու պահին կարող էր հասկանալ իր կատարած գործողությունները, այսինքն` նա մեղսունակ է: Ըստ նույն եզրակացության` Ս. Դավթյանը դատապարտվելու դեպքում պետք է հոգեբույժի կողմից  ամբուլատոր բուժում ստանա և կալանավայրում գտնվի նրա հսկողության տակ:

Նիստին ներկա չէին նաև ամբաստանյալները, սակայն նրանց ներկայությունը ապահովելը հարկ չէր համարել Մ. Պապոյանը, քանի որ արդեն իսկ  հայտնի էր, որ տուժողների բացակայության պայմաններում անհնար է շարունակել նիստը:

Հաջորդ դատական նիստը տեղի կունենա հաջորդ տարի` հունվարի 21-ին: