Պետական դավաճանության գործով բողոքներ են ներկայացվել Վճռաբեկ դատարան

Մեկ ընդհանուր գործի շրջանակներում պետական դավաճանության մեջ մեղադրվող ամբաստանյալներ Կարեն Մեհրաբյանը, Ռոմիկ Մաթևոսյանը, Կարեն Պետրոսյանը և Աշոտ Չտրկյանը դիմել են ՀՀ Վճռաբեկ դատարան: Գործը վարույթ ընդունել կամ չընդունելու որոշում չի կայացվել:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, ամբաստանյալ Կարեն Մեհրաբյանին մեղավոր էր ճանաչել ՀՀ քրեական օրենսգրքի 299-րդ հոդվածի 1-ին մասով՝ պետական դավաճանություն, ներկայացված մեղադրանքում և դատապարտել 14 տարվա ազատազրկման` գույքի կեսի բռնագրավմամբ:

Ամբաստանյալ Ռոմիկ Մաթևոսյանը նույնպես մեղավոր էր ճանաչվել ՀՀ քրեական օրենսգրքի 299-րդ հոդվածի 1-ին մասով և դատապարտվել 10 տարվա ազատազրկման՝ առանց գույքի բռնագրավման: Ամբաստանյալ Աշոտ Չտրկյանը մեղավոր էր ճանաչվել պետական դավաճանությանը օժանդակելու մեջ և դատապարտվել 10 տարվա ազատազրկման` առանց գույքի բռնագրավման: Ամբաստանյալներ Կարեն Պետրոսյանն ու Արթուր Ավետիքյանը մեղավոր էին ճանաչվել ՀՀ քրեական օրենսգրքի 335-րդ հոդվածի 1-ին մասով՝ Հանցագործության մասին չհայտնելը, և դատապարտվել մեկուկես տարվա ազատազրկման։

Ամբաստանյալ Դավիթ Ավետիքյանը նույնպես մեղավոր էր ճանաչվել ՀՀ քրեական օրենսգրքի 335-րդ հոդվածի 1-ին մասով և դատապարտվել տուգանքի՝ նվազագույն աշխատավարձի հինգհարյուրապատիկի` 500.000 ՀՀ դրամ գումարի չափով։

ՀՀ Վերաքննիչ քրեական դատարանը առաջին ատյանի դատարանի դատավճիռը թողել էր անփոփոխ և մերժել վերաքննիչ բողոքները: Դրանցում ամբաստանյալները միջնորդում էին բեկանել Կենտրոն և Նորք-Մարաշ վարչական շրջանների ընդհանուր իրավասության դատարանի հիշյալ դատավճիռը՝ կարճել գործի վարույթը կամ ամբողջությամբ բեկանել դատական ակտը և գործն ուղարկել համապատասխան ստորադաս դատարան նոր քննության' սահմանելով նոր քննության ծավալ:

Ամբաստանյալներից Աշոտ Չտրկյանը բազմիցս նշել է, որ ինքն անմեղ է: Օրեր առաջ նախագահական նստավայրի առջև նստացույց իրականացնող նրա մայրը` Անահիտ Չտրկյանը ՀՀ նախագահին, վարչապետին և գլխավոր դատախազին ուղղված նամակներում խնդրել է վերանայել որդու գործը և ճանաչել նրա անմեղությունը: