Արձագանքել է միայն ՀԱԵ Շիրակի թեմի առաջնորդը

«Շիրակ կենտրոն» ՀԿ-ն իշխանության տարբեր մարմիններին պարբերաբար տարաբնույթ գրություններ է ուղարկոմ անօթևան ընտանիքներին հուզող խնդիրների և բնակբաշխման գործընթացի վերաբերյալ:

Նմանատիպ մի գրություն-միջնորդագիր էլ հոկտեմբերի 17-ին ուղարկվել էր ՀՀ քաղաքաշինության նախարարին`  խնդրանքով դուռ, պատուհան և կտուր չունեցող կիսակառույց շինության մեջ, իսկ ձմռան ամիսներին նաեւ կայարանում կամ շենքերի մուտքերում գիշերող Սուսաննա Եղտիարյանին, բացառության կարգով, հատկացնել դեռևս նախորդ տարի Մուշ-2 թաղամասում շահագործված, սակայն մինչև օրս չբաշխված հինգ բնակարաններից մեկը:

Սուսաննա Եղտիարյանի ընտանիքը երկրաշարժին կորցրել է 2 սենյականոց բնակարան, սակայն ներկայումս նա` բարձրագույն կրթությամբ 62-ամյա կինը, միայնակ է, որդին և քույրը մահացել են, ուստի հաշվառված է Գյումրու անօթևանների հերթացուցակի` 1-սենյականոց բնակարանների հավակնորդների 812-րդ հերթական համարում:

«Շիրակ կենտրոն»-ի միջնորդագիր հոկտեմբերի 19-ին մերժվել է ՀՀ քաղաքաշինության նախարար Վարդան Վարդանյանի կողմից, սակայն նրա հորդորով` Գյումրու քաղաքապետարանի աշխատակազմի բնակարանների հաշվառման և բաշխման բաժնի պետը խոստացել է մինչև հաջորդ տարի նախատեսվող բնակարանամուտը կնոջն ապահովել հանրակացարանով:

Մի քանի օր առաջ, երբ ՀԿ-ի ներկայացուցիչներն այցելել են  Սուսաննա Եղտիարյանին, նրան տեսել են ցրտից կապտած, հիվանդ և անօգնական վիճակում: Բարեբախտաբար, օգնության ձեռք է մեկնել ՀԱԵ Շիրակի թեմի առաջնորդը` անտուն կնոջը տաք և ապահով ապաստան տրամադրելով թեմի սոցիալ-կրթական կենտրոնի շենքում: