ԱԶԳ. Լարվածություն հայկական Բուրջ Համուդի մատույցներում

Վերջին օրերին լարվածություն է նկատվում Լիբանանի մայրաքաղաքին կից հայաշատ Բուրջ Համուդ քաղաք-թաղամասին հարող, մասնավորաբար` Նաբաա եւ Դոուրա շրջաններում, որտեղ անհամեմատ շատացել են քրդերն ու թյուրքմենները: Նրանց մեծ մասը Լիբանան է մտել հարեւան Սիրիայից, որտեղ շատ քրդեր մասնակցություն են ունենում հակաիշխանական խռովություններին:

Բուրջ Համուդի մատույցներում գտնվող վերոհիշյալ շրջաններում, հատկապես` հայկական Արագած եւ Նոր Ամանոս թաղերում, վերջին ժամանակներին ավելացել են քրդերի եւ թյուրքմենների ոտնձգությունները հայերի ու հայապատկան ինչքերի նկատմամբ, լկտի պահվածքի դրսեւորումները` տեղի հայ ընտանիքների դեմ: Վերջին ուրբաթ եւ շաբաթ օրերին տեղի են ունեցել փողոցային բախումներ, դանակահարվել են մի քանի հայ երիտասարդներ:

Չի ուշացել ուժգին հակահարվածը, որից հետո հնչել է Բուրջ Համուդում տիրապետող ՀՅ Դաշնակցության ներկայացուցիչների պահանջը քրդերից` հեռանալ հայաբնակ թաղերից:

Տեղեկացնենք, որ քրդերը Լիբանանում մինչեւ վերջին ժամանակները քաղաքական ներկայություն, հետեւաբար ազդեցություն չունեին: Միայն վերջին իրաքյան պատերազմից հետո նրանք ողջ տարածաշրջանում կարեւոր ֆակտոր են դարձել, ինչը, հավանաբար, նրանց լկտի պահվածքին թեւեր է տվել Լիբանանում: Այնուամենայնիվ, տեղի հայությունը պետք է զգույշ լինի, որպեսզի արհեստականորեն միջէթնիկական հարթակ չտեղափոխվի լարվածությունը, որը կարող է շահարկվել 3-րդ ուժերի կողմից: