"Ժառանգությունը" պատրաստ է "մերան" լինել

Շատ վատ կլինի, եթե ընդդիմությունը առանձին-առանձին գնա ընտրության, քանի որ նախորդ անգամ մոտ 30 տոկոս ընդդիմադիր ձայն փոշիացավ ու նվիրաբերվեց իշխանությանը: «Նմանատիպ գործելաոճը հիմա, կարծում եմ, այդքան էլ ճիշտ չէ»,- քաղաքական հնարավոր դաշինքների մասին քննարկման ժամանակ ասաց «Ժառանգություն» խմբակցության պատգամավոր Արմեն Մարտիրոսյանը:

«Մի քիչ դժվար եմ պատկերացնում ՀԱԿ- Դաշնակցություն համագործակցությունը, սակայն այստեղ, եթե «Ժառանգությունը» կարողանար «մերան» լինել, քանի որ երկուսի հետ էլ համագործակցություն եղել է, կարծում եմ` այդ խնդիրը չէր առաջանա»,- ասաց պատգամավորը` նշելով, որ դա իրականացնելը շատ բարդ է:

Անդրադառնալով գործող կոալիցիայի ձեւավորմանը` Արմեն Մարտիրոսյանը նշեց, որ, իր կարծիքով, ի սկզբանե պարզ է եղել, թե ովքեր պիտի լինեն կոալիցիայի անդամ, ինչ հարաբերակցությամբ,  եւ հենց այս թվերի կապակցությամբ էլ եղել են պայմանավորվածությունները:

Իսկ հիմնական խնդիրը, Արմեն Մարտիրոսյանի խոսքերով, այն է, որ  թե' կոալիցիան, թե' ընդդիմության միավորումները չեն ձեւավորվել գաղափարական հենքի վրա, իսկ դաշինքները չպետք է ինքնանպատակ լինեն: