Լինել լուռ` նշանակում է հանցակից լինել. Նարինե Թուխիկյանը` եզդիների համատարած ջարդի մասին

Աշխարհի որևէ անկյունում որևէ ժողովրդի հանդեպ` անկախ կրոնական, էթնիկ պատկանելությունից, չի կարելի նման բան իրագործել, դա ոճրագործություն է մարդկության դեմ. Yerkir.am-ի հետ զրույցում նշեց Հովհ. Թումանյանի տուն-թանգարանի տնօրեն Նարինե Թուխիկյանը` անդրադառնալով վերջին շրջանում Իրաքում եզդիների համատարած ջարդին:

Նա նշեց նաև, որ մենք պետք է ամեն կերպ աջակցենք մեր եզդի եղբայրներին: «Չի կարելի անտարբեր լինել, սառը կամ մոռացկոտ, հատկապես` մենք, որ անցել ենք այդ ճանապարհով: Օրերս համացանցում զոհված երեխաների նկարներն էին տեղադրել` 1915 թվականի սև-սպիտակ կադրերը և այսօրվա գունավոր կադրերը, կարծես կրկնօրինակած լինեին` ուղղակի գույն տված: Աշխարհն ինչո՞ւ է քնած, չգիտեմ: 21-րդ դարում այդպիսի սոսկալի ջարդ ու համատարած լռություն, ուղղակի սարսափելի է»,- ասաց Թուխիկյանը:

Ըստ նրա` իրականացվող ջարդի հանդեպ լինել լուռ կամ անտարբեր` նշանակում է հանցակից լինել: