Մեկ այլ երկրի վարչապետն այդպիսի արտահայտություն չէր անի

Այսօր ակնառու է, որ բոլոր կուսակցությունները շատ վաղուց որդեգրել են մի ուղի` այս կամ այն ձևով գործարքի մեջ մտնել իշխանության հետ:

«Ամեն մեկը լսում է այն, ինչ ուզում է լսել: Այստեղ կա երկու դրույթ` փաստ եւ մեկնաբանություն: Փաստերը սովորաբար նույնն են, մեկնաբանությունները` տարբեր: Հարց է ծագում, թե ո՞ւմ է ուղղված վարչապետի հաղորդագրությունը: Կան մեկնաբանություններ, ըստ որոնց` հաղորդագրությունն ուղղված է այն ուժերին, որոնք փորձում են ոչ կառուցողական դիրքորոշմամբ հանդես գալ քաղաքական դաշտում: Սակայն իրականում դա ուղղված է ոչ կոալիցիոն գործընկերներին»,- հայտարարեց քաղաքագետ Ալեքսանդր Մարգարովը` անդրադառնալով Տիգրան Սարգսյանի այն հայտարարությանը, թե ով ՀՀԿ-ի հետ չլինի, կհայտնվի կոտրած տաշտակի առջև:

Քաղաքագետի համոզմամբ`  ընտրություններով չի կարող որոշվել, թե ով է իշխելու երկրում: «Չեմ կարծում, որ որեւէ այլ երկրում, եթե վարչապետը նման բան ասեր, կմնար իր պաշտոնում»,- հայտարարեց Ալեքսանդր Մարգարովը: Նա իշխանության քաղաքականությունը նկարագրեց «ով մեր դեմ չէ, մեզ հետ է» արտահայտությամբ`  համարելով այն ավելի կառուցողական:

«Ես չեմ հասկանում, թե ինչո՞ւ է վարչապետը զբաղվում նման հարցերով: Մեր երկրում արդարադատության համակարգը նորմալ չի գործում»,- ավելացրեց քաղաքագետ Մանվել Սարգսյանը: Նա այսօրվա իրականությունը փոքր-ինչ տխուր է համարում, քանի որ ազատ ընտրություններին շատ քչերն են հավատում եւ խոսում դրա մասին: