Ցնցված պրծած ենք, էլ ի՞նչը ցնցվի

Տնտեսական ցնցումներ Հայաստանում չեն լինի. լրագրողների հետ հանդիպման ժամանակ վստահեցրեց ՀԱԿ անդամ, տնտեսագետ Հրանտ Բագրատյանը եւ հավելեց. «Ցնցված պրծած ենք, էլ ի՞նչը ցնցվի»:

Առաջիկա ամիսներին, ըստ նրա, ոչ մի լավ բան էլ չի լինի, չի լինի նաեւ ճգնաժամի երկրորդ փուլ: Բագրատյանը համոզված է, որ պարզապես ճգնաժամի առաջին փուլն է շարունակվում, որն էլ, ըստ նրա կանխատեսումների, կտեւի 10-15 տարի եւ կարող է քաղաքական բախումների հանգեցնել, ինչպես, օրինակ, եղավ արաբական աշխարհում: Նման պայմաններում, ըստ Բագրատյանի, պետք են հստակ քայլեր ձեռնարկել: Նա թվարկեց դրանցից մի քանիսը:

Բագրատյանի հավաստիացմամբ` նախ հարկավոր է ստերիլիզացնել դրսից եկող օգնությունը, վարկավորման տոկոսները 14 տոկոսից պետք է իջեցնել 3-4 տոկոսի, ձեռներեցների թիվը դարձնել 40 տոկոս, վաճառել հանքերը, կարգավորել մոնոպոլիաները:

Արդեն ավանդույթ է դարձել, որ Հրանտ Բագրատյանի ասուլիսը չի կարող անցնել առանց Տիգրան Սարգսյանի հասցեին հնչած վիրավորանքի. Բագրատյանը հայտարարեց, որ Տիգրան Սարգսյանը կարող է վատ վարչապետը լինել, բայց ոչ ցինիկ: Նա նաեւ նշեց, որ վաղը Տիգրան Սարգսյանը պաուզա կտա եւ 15 օր անց իր թվարկած քայլերից 3-ի մասին կհայտարարի: