101 միլիարդն իրատեսական թիվ է

2012թ. բյուջեի հարկային մուտքերը 101 միլիարդով ավելացնելու` վարչապետի հայտարարությունը, տնտեսագետ Կառլեն Խաչատրյանի կարծիքով, բավական իրատեսական է, քանի որ մեր երկրում դրա համար կան բոլոր նախադրյալները:

Ռեզերվների թվում տնտեսագետը նշեց ստվերային տնտեսության զգալի չափերը, որոնք տարբեր գնահատականներով կազմում են ՀՆԱ-ի 40-50 տոկոսը, ինչպես նաեւ մոնոպոլիաների եւ օլիգոպոլիաների գերշահույթները:

«Եթե կառավարությունը կարողանա համապատասխան միջոցառումներ ձեռնարկել ստվերի կրճատման ուղղությամբ, դա, բնականաբար, կմեծացնի ՀՆԱ-ն, ինչն էլ ավելի մեծ հարկային եկամուտներ կապահովի»,- նշեց նա` հավելելով, որ մենք նաեւ որոշակի ռեզերվներ ունենք` կապված մոնոպոլիաների եւ օլիգոպոլիաների բավական բարձր շահույթների հետ:

Նրա համոզմամբ` եթե կառավարությունը կարողանա այս ուղղությունների վրա շեշտադրում կատարել, ապա գալիք բյուջեում հարկային մուտքերն ու սոցվճարները 101 մլրդ-ով ավելացնելու ծրագիրը նրան կհաջողվի: