Թիվ 2-ը կդառնա թիվ 1

Աշխարհի թիվ 1 ահաբեկչի սպանությունից հետո ուշադրության կենտրոնում է հայտնվել թիվ 2 ահաբեկիչը` Այման աս Զավահիրին:

Մի շարք արաբ քաղաքական մեկնաբաններ արդեն կարծիք են հայտնել, որ 55-ամյա եգիպտացին կղեկավարի համաշխարհային ահաբեկչական ցանցը, «եթե, իհարկե, ինքն էլ Պակիստանում իրականացված հատուկ գործողությանը զոհ չի գնացել». տեղեկացնում է ԻՏԱՌ-ՏԱՍՍ-ը:

Զավահիրին վերջին անգամ հրապարակային ելույթ էր ունեցել ապրիլի 15-ին` ինտերնետում` կոչ անելով բոլոր մահմեդականներին պայքարել «Մուամար Քադաֆիի վարձկանների եւ ՆԱՏՕ-ի ուժերի դեմ»:

Ի դեպ, ինչպես Ուսամա բեն Լադենի, այնպես էլ աս Զավահիրիի մասին որեւէ տեղեկատվության համար ԱՄՆ-ը պատրաստ է վճարել 25 մլն դոլար: