Ուժով "բերման ենթարկեցին" Վարդգես Գասպարիին

Հայաստանի կառավարության շենքի մոտ խաղաղ պայմաններում զոհված զինծառայողների հարազատների ամենշաբաթյա ցույցին այսօր միացել էին «Ժառանգության» պատգամավոր Զարուհի Փոստանջյանը եւ ՀԱԿ անդամ Վարդգես Գասպարին:

Ցույցը սկզբում խաղաղ էր ընթանում, սակայն, երբ կառավարության շենքից սկսեցին դուրս գալ կառավարության անդամները, այլ ընթացք ստացավ: Երբ մասնակիցները որոշեցին երթով գնալ դեպի նախագահական նստավայր, ոստիկանները գետնին տապալեցին Վարդգես Գասպարիին, ԱԺ պատգամավոր Զարուհի Փոստանջյանին եւ ակցիայի մի քանի այլ մասնակիցների:

Ոստիկանները, մերկացնելով Գասպարիին, ուժով նրան նստեցրին մեքենան ու տարան: Պատճառն այն է, որ նա փորձել էր  ոստիկաններից պաշտպանել մի աղջկա, որը հանդգնել էր «ճանապարհ չտալ» ոստիկանապետ Ալիկ Սարգսյանին. նախարարն անպայման պիտի ցուցարարների միջով անցներ: Վարդգես Գասպարին սրիկա էր անվանել ոստիկանապետին, իսկ բողոքի ակցիայի մասնակիցները վանկարկել էին` ա-մոթ:

Ալիկ Սարգսյանը հրաժարվեց պատասխանել որեւէ հարցի: Իսկ Զարուհի Փոստանջյանը «Երկիր»-ի հետ զրույցում ասաց, թե այս իրավիճակն անհապաղ լուծումների պահանջ է դնում իշխանությունների առջեւ, ովքեր էլ հովանավորում են բանակում կատարվող հանցագործությունները: