Կանխվել է հերթական ինքնասպանությունը կամ վրեժխնդրությունը

Երեկ Հանրային հեռուստաընկերության «Առաջին լրատվական»-ով եթեր է հեռարձակվել լրագրող Արթուր Գրիգորյանի պատրաստած տեսանյութը, որում պաշտպանության նախարարության ձեռք բերած օպերատիվ տեսաձայնագրությունն էր. կադրերում` մի զինվորի ենթարկում են խմբակային դաժան ծեծի։ Տեսաձայնագրությունը դիտելու համար ՊՆ փոխնախարար Վլադիմիր Գասպարյանն իր մոտ էր հրավիրել  ծեծը կազմակերպած զինծառայողների ծնողներին:

ՊՆ փոխնախարարը տեղեկացրել է ծնողներին, որ ծեծը տեղի է ունեցել ցերեկը, իսկ ծեծի ենթարկված զինվորը երեկոյան պիտի զենքը ձեռքին կանգներ հերթապահության, և կարելի էր սպասել թե' ինքնասպանություն, թե' վրեժխնդրություն։ Եվ այդ դեպքում, թերևս, ծնողները գալու էին ՊՆ-ից իրենց որդիներին պահանջելու։

Ծեծը կազմակերպողների հայրերը չեն կարողացել զսպել ամոթի և զայրույթի պոռթկումները եւ կշտամբել են իրենց որդիներին:

Ներկայացնելով բանակում կատարվող սպանությունների դեմ բողոքող ՀԿ-ների (որոնք հիմնականում ֆինանսավորվում են դրսից) մի շարք անտրամաբանական և տարօրինակ հայտերը,  փոխնախարարը նշել է, որ պետք է հնարավորինս սահմանափակել օտարների կողմից ֆինանսավորվող և նրանց պատվերը կատարող կազմակերպությունների գործունեությունը բանակում: