ԺՈՂՈՎՈՒՐԴ. Հերմինեն խլե՞լ է

«Վերադարձրե՛ք մեր տները», «Ամոթ է, պատգամավորները եւ տոկոսչիները խլում են մեր տարիների քրտինքը» ցուցապաստառներով երեկ նախագահի նստավայի մոտ բողոքի ակցիա էին կազմակերպել Գ. Չավուշի 14/3 եւ Նորաշեն 37 հասցեների անավարտ շենքների բնակիչները:

Նրանց փոխանցմամբ` ի հայտ եկած նոր սեփականատերերը կադաստրից ապօրինաբար ստացել են սեփականության վկայականներ, քանի որ կառուցապատող ընկերությունն իրավունք չուներ առքուվաճառք կատարել առանց ապագա բնակիչների մասնակցության: Չնչին գումարներով նոր բնակարաններ ձեռք բերած սեփականատերերի ցուցակում շրջանառվում է նաեւ ԱԺ պատգամավոր Հերմինե Նաղդալյանի անունը:

Տուժող Մելիք Շահինյանի տեղեկացմամբ` 14 բնակարանի տեր է կանգնել Հերմինե Նաղդալյանի ամուսինը. «Տեր է կանգնել տոկոսի դիմաց, եւ իսկական բնակիչները դուրս են մնացել: Բազմիցս Հերմինե Նաղդալյանը խնդրել ա, որ բնակիչներն իր անունը չտան միտինգների, ցույցերի ժամանակ: Բնակիչները հավատացել են, եւ այսօր նա խաբում է բոլորին, ոչ մի բնակարանից չի հրաժարվում»: