Բանակցությունների գործընթացը սառեցված է

Ռուսաստանի նոր վարչակարգի կողմից թե' հայկական, թե' ադրբեջանական կողմի վրա ճնշում չի լինի. այսօր լրագրողների հետ հանդիպման ժամանակ հայտարարեց քաղաքագետ Հրանտ Մելիք-Շահնազարյանը` նշելով, որ Պուտինը բազմիցս հայտարարել է, որ ավելի լավ է կողմերն իրենք լեզու գտնեն իրար հետ:

Քաղաքագետը կարծիք հայտնեց, որ Ռուսաստանի`  միջնորդ առաքելության էստաֆետն աստիճանաբար փոխանցվում է Ֆրանսիային, եւ ԼՂ հակամարտության կողմերի միջեւ հաջորդ հանդիպումները կփորձի կազմակերպել ֆրանսիական կողմը: Սակայն քաղաքագետը չի հավատում, թե այս գործընթացում Ֆրանսիան հաջողության կհասնի:

«Իմ կարծիքով`  պարզապես ժամանակ է տրվում է հակամարտության կողմերին, եւ գուցե դա տեւի մի տասնամյակ: Այդ ժամանակը պետք է օգտագործել արդեն իսկ ձեռք բերված հաջողություններն ամրագրելու համար: Դա, առաջին հերթին, ազատագրված տարածքների բնակեցումն ու յուրացումն է, որը պետք է իրականացնի հայկական կողմը»,- ասաց Հ. Մելիք-Շահնազարյանը:

Նա ընդգծեց, որ այս պահին կարող ենք խոսել միայն գործընթացի երկարատեւ սառեցման մասին` չբացառելով, որ կարող է լինել «դեկորատիվ» քաղաքականություն, որը, սակայն, իրական որոշումների կայացման հնարավորություն չի տա:

Ինչ վերաբերում է համանախագահող երկրներին, ապա, նրա կարծիքով, Մինսկի խումբը միջնորդից վաղուց վերածվել է խորհրդատվական խմբի, որտեղ աշխարհի երեք քաղաքական կենտրոնները պարզապես քննարկում են տարածաշրջանում ստեղծված իրավիճակը եւ փորձում են համաձայնեցնել իրենց գործողությունները` տարածաշրջանում խաղաղությունը պահպանելու առումով:

«Պարզ է, որ ստեղծված ձեւաչափում հարցերը չեն լուծվելու, իսկ ձեւաչափի փոփոխության մեկ տարբերակ կա` Արցախի մասնակցությունը բանակցային գործընթացին»,- ընդգծեց քաղաքագետը: