Ի՞նչն է Նարեկ Սարգսյանին դուր գալիս Հյուսիսային պողոտայում

Լրագրողներն այսօր Երեւանի գլխավոր ճարտարապետ Նարեկ Սարգսյանից հետաքրքրվեցին, թե ի՞նչն է նրան դուր գալիս իր հեղինակած Հյուսիսային պողոտայում:

«Ավելի լավ է` հարցնեք, թե ինչը դուր չի գալիս,- ասաց նա:- Միջավայրը դեռեւս շատ չոր է, բայց համոզված եմ, որ պողոտան շուտով կլինի քաղաքի ամենակարեւոր առանցքներից մեկը»:

«Ինչո՞ւ բազմաթիվ մարդկանց զրկեցին կացարանից` կառուցելով էլիտար շենքեր, որոնք մինչ օրս լիարժեք բնակեցված չեն»` լրագրողի այս դիտարկմանն ի պատասխան` Նարեկ Սարգսյանը նշեց, որ այն քաղաքաշինական չարորակ ուռուցքը, որը կար Երեւանի մարմնի վրա, պետք էր վերացնել, եւ այն, ինչ կառուցված է Հյուսիսային պողոտայում` լավ կամ վատ, համեմատելի չէ նրա հետ, ինչը կար նախկինում:

«Հիմա կա հանրային տարածք, մարդիկ զբոսնում են, հսկայական ժողովուրդ կա այդտեղ: Ես առ այսօր չեմ հասկանում այդ հարցերի իմաստը: Ես կհասկանայի, եթե ասեին` շենքը տգեղ է, բարձր է կամ լայն, բայց քննարկել` արժե՞ր կառուցել, թե չէ, ես դա չեմ հասկանում»,- տարակուսեց ճարտարապետը: