Եթե կան մարդիկ, որոնք ինձ դուր չեն գալիս, նրանց մաքրում եմ իմ միջավայրից. Զարուհի Փոստանջյան

ԵՏՄ-ին Հայաստանի անդամակցության հարցը շուտով դրվելու է քննարկման Ազգային ժողովում, որին հետևելու է քվեարկությունը:

«Ժառանգություն» խմբակցության պատգամավոր Զարուհի Փոստանջյանը հստակ դիրքորոշմամբ դեմ է քվեարկելու, իսկ «Ժառանգություն» խմբակցության ղեկավար Ռուբեն Հակոբյանը չի բացառել կողմ քվեարկելու հնարավորությունը: Նրա այդ հայտարարությունը նրա կուսակից Զարուհի Փոստանջյանը մեկնաբանել է որպես մոլորություն:

Այսօր լրագրողների հետ հանդիպման ժամանակ, պատասխանելով Yerkir.am-ի հարցին` զրուցե՞լ է, արդյոք, Ռուբեն Հակոբյանի հետ, և ինչպես՞ է նա ընդունել «մոլորության մասին» հայտարարությունը, Զարուհի Փոստանջյանը պատասխանեց. «Չէ, ես նրա հետ չեմ խոսել, բայց ոչ միայն այն մարդիկ, ովքեր այս պահին մոլորված են, այլև ԱԺ-ում մոլորությունը պետք է տեղ չունենա, և այն անձինք, ովքեր կողմ կքվեարկեն ԵՏՄ-ին Հայաստանի բռնակցմանը, նրանք պետք է համարվեն պետական դավաճաններ, որովհետև դա այլ կերպ, քան դավաճանություն, չի կարելի անվանել»:

Պատգամավորի համոզմամբ` Հայաստանին բռնակցում են անկումային տնտեսություն ունեցող ավտորիտար ռեժիմներին:

Հարցին` արդյո՞ք նման կարևոր հարցում տարակարծությունների վերաբերյալ խնդիրը բարձրացրել են «Ժառանգություն» խմբակցության ներսում, Զարուհի Փոստանջյանը պատասխանեց, որ շուտով գումարելու են վարչության նիստ, որտեղ էլ պետք է անդրադառնան այդ հարցերին:

Yerkir.am-ի այն հարցին` հնարավո՞ր է, որ իր քաղաքական հետագա գործունեության ճանապարհին ինչ-որ բան ստիպի դուրս գալ «Ժառանգություն» կուսակցությունից,  պատգամավորը պատասխանեց. «Ես կարող եմ ընդհանրապես դուրս գալ քաղաքականությունից, բայց որտեղ որ ես գնում եմ, ես այնտեղից դուրս չեմ գալիս: Իսկ եթե կան մարդիկ, որոնք ինձ դուր չեն գալիս, ես ինքս եմ մաքրում իմ միջավայրից»: