Բժշկականի նոր գույնը գլխավոր ճարտարապետի սրտով էլ չէ

Պարզվում է` ներկվող Երեւանի որոշ դրվագներ նաեւ քաղաքի գլխավոր ճարտարապետ Նարեկ Սարգսյանի սրտով չեն:

Մասնավորապես` այսօր հրավիրված ասուլիսում ճարտարապետը խոստովանեց, որ, օրինակ, բժշկական համալսարանն իր համար եւս անընդունելի գույնով է ներկված, եւ վստահեցրեց, որ առաջիկայում գույները կփոխվեն:

Ն. Սարգսյանը նշեց, որ այնպիսի մասսայական գործընթաց, ինչպիսին շենքերի ներկումն է, Երեւանում առաջին անգամ է իրականացվում:

«Շատ հնարավոր է, որ գույների մեջ լինեն ոչ ներդաշնակ համակցություններ, բացի այդ` բոլորին չես կարող գոհացնել գույների առումով, տարբեր ճաշակներ կան»,- նշեց ճարտարապետը:

Նա նաեւ տեղեկացրեց, որ Երեւանի շենքերը ներկելու ծրագիրը կլինի շարունակական, մինչեւ համատիրությունները կայանան եւ հասկանան, որ շենքերի արտաքին բարեկարգումն իրենց խնդիրն է: