Բժշկականի ուսանողները կվճարեն ոչ թե ցիկլի, այլ կոնկրետ բացակայած դասաժամի համար

Երեկ Մ. Հերացու անվան պետական բժշկական համալսարանում ժողով է եղել եւ, ի թիվս այլ հարցերի, քննարկվել է նաեւ ուսանողների բացակայության եւ դրանք լրացնելու հետ կապված խնդիրը:

Yerkir.am-ի հետ զրույցում համալսարանի ուսխորհրդի նախագահ Կարեն Հակոբյանը նշեց, որ երեկ ընդունվել է որոշում` իրենց` ուսանողների խնդրանքին ընդառաջ գնալով:

«Եթե նախկինում երկու շաբաթանոց ցիկլում մեկ բացակայից ավելի ունենալու դեպքում ուսանողը պետք է լրացներ համապատասխան շաբաթվա ցիկլը, ապա այժմ` միայն տվյալ ժամը: Ցիկլը կրթական ժամանակահատվածն է, օրինակ` վիրաբուժություն առարկան կարող է ունենալ հինգ շաբաթանոց ցիկլ, եւ եթե ուսանողը 5-րդ շաբաթում բացակայել է երկու օր, նա պետք է վերջին շաբաթն ամբողջովին լրացներ, իսկ եթե բացակայությունն անցնում է 15 տոկոսի սահմանը, պետք է լրացներ ամբողջ` 5-շաբաթյա ցիկլը: Իսկ հիմա, մեր ուսանողների խնդրանքով, այն շաբաթը կամ շաբաթները, որոնցից մի քանի օր բացակայել են, նրանք կլրացնեն կոնկրետ օրը: Նախկինում ոչ միայն գումարն էր շատ լինում, այլ նաեւ վատնած ժամանակը»,- ասաց Հակոբյանը:

Ըստ նրա` քանի որ այդ լրացման մեղավորը իրենք` ուսանողներն են, եւ որի համար դասախոսը հավելյալ աշխատանք պետք է կատարի, իրենք էլ պարտավոր են վճարել դասախոսին, որ իրենց հետ բաց թողածը հավելյալ պարապի:

Ի դեպ, եթե ուսանողը բացակայել է առողջական խնդիրների պատճառով, Հակոբյանի հավաստմամբ, հատուկ հանձնաժողովը որոշում է կայացնում եւ վճարումը կատարվում է բուհի հաշվին, իսկ եթե անհարգելի է, ուսանողը պետք է վճարի ինքը: Միջին հաշվարկով` մեկ օրվա բացակայությունները լրացնելու գումարը մոտավորապես 4000 դրամ է: