Ես իմ գոտին չեմ նվիրել նախագահին հողատարածքի դիմաց. Վիկ Դարչինյան (տեսանյութ)

Այսօր կայացած մամուլի ասուլիսում Վիկ Դարչինյանը պատասխանեց լրագրողների հարցերին:

-Ինչպե՞ս ստացվեց, որ Ձեր մոտ ցանկություն առաջացավ «Հայաստանն ընդդեմ աշխարհի» շոուն անցկացնել  Հայաստանում, ե՞րբ ծագեց այդ միտքը:

- Ճիշտն ասած, այդ միտքը վաղուց կար ինձ մոտ, սակայն երկար ժամանակ չէր ստացվում այն իրականացնել, երկար ժամանակ բանակցություններ վարեցինք և, ի վերջո, թույտվություն ստացանք:

-Գո՞հ եք շոուից:

- Այո, միանշանակ այն արդարացրեց իմ բոլոր սպասելիքները: Շոուի հիմնական նպատակն էր աշխարհին ցույց տալ, որ Հայաստանը նույնպես կարող է նմանատիպ միջազգային մրցումներ անցկացնել, և, ինչպես տեսանք, դա ստացվեց: Ուզում եմ շնորհակալություն հայտնել բոլոր այն մարդկանց, ովքեր աջակցել են, բոլոր հովանավորներին: 

- Որքա՞ն գումար ծախսեցիք  շոուի վրա:

- Շնորհակալ եմ հովանավորներից, սակայն կարող եմ ասել, որ անձամբ ես ավելի շատ գումար եմ ներդրել իմ գրպանից: 

-Մամուլում բավականին ակտիվ քննարկվում էր Ձեր գոտին նախագահին նվիրելու փաստը, ինչը բազմաթիվ տհաճ արձագանքների պատճառ հանդիսացավ:

- Ես շատ վիրավորված եմ իմ քայլը նմանատիպ մեկնաբանության արժանացնելու փաստից: Կարծում եմ` բոլորն էլ լավ գիտեն, թե խոսքն ում է վերաբերում: Իմ գոտին նախագահին նվիրելու մտադրության մասին ոչ մեկ չգիտեր, դա, այսպես ասած, անակնկալ էր: Այժմ ինձ համար պատրաստում են գոտու կրկնօրինակը: Ես ևս մեկ անգամ կրկնում եմ` նախագահին նվիրել եմ իմ գոտին, ոչ թե տիտղոսը: Եվ այն կարծիքը, որ ես գոտին նվիրել եմ մարզադպրոցի հողատարածքի դիմաց, սխալ է: Այն ինձ ուղղակի տվել են մատչելի գներով:

-Ի՞նչ ընթացքի մեջ է մարզադպրոցի շինարարությունը: Այն Երևանո՞ւմ է լինելու, թե՞ Վանաձորում:

-Մարզադպրոցը Երևանում է կառուցվելու, դեռևս քննարկվում են մանրամասները` կապված տեղի հետ, որից հետո էլ կսկսվի շինարարությունը: Ես մեծ հույսեր ունեմ` կապված այդ մարզադպրոցի հետ, այն լավ միջոց է երեխաներին փողոցներից կտրելու և լավ ապագա ապահովելու, քանի որ ինքս նկատել եմ, որ լավ պոտենցիալ ուժ ու հեռանկարներ  ունեցողները շատ են: