Նիհարել կարելի է` շատ ջուր խմելով

Ամերիկացի գիտնականները պարզել են, որ այն մարդիկ, ովքեր հավելյալ քաշից ազատվելու խնդիր ունեն, պետք է ուտելուց առաջ երկու բաժակ ջուր խմեն, ինչը նպաստում է արագ հագեցմանը և նվազեցնում կալորիաների օգտագործումը:

Ինչպես տեղեկացնում է doctors.am-ը, հետազոտությանը մասնակցել է 55-75 տարեկան 48 մարդ, ովքեր կանխավ բաժանվել էին երկու խմբի: Հետազոտության ընթացքում բոլորն օգտագործել են ցածր կալորիականություն ունեցող սնունդ: Կամավորների խումբը սնունդից առաջ խմել է մոտ 480 մմ մաքուր ջուր, իսկ վերահսկվող խումբը դա չի արել:

Հայտնաբերվել է, որ այն մասնակիցները, ովքեր ուտելուց առաջ ջուր են խմել, 75-90 կալորիա ավելի քիչ են կերել, քան վերահսկվող խմբի անդամները: Արդյունքում` փորձից 12 շաբաթ անց կամավորների խմբի մասնակիցների միջին քաշը նվազել է ավելի քան 7 կգ-ով, իսկ վերհսկվող խմբում` 5 կգ-ով: «Ջրային նիհարումից» հետո ոչ ցանկալի հետեւանքներ չեն նկատվել:

Հետազոտությունների ղեկավար Բրենդի Դեւի կարծիքով` ջրի նման ազդեցությունը, ամենայն հավանականությամբ, պայմանավորված է նրանով, որ ջուր խմելու դեպքում որովայնը կանխավ որոշ չափով լցվում է ոչ կալորիական նյութով, և քաղցի զգացումը համեմատաբար նահանջում է: Պետք է նշել, որ այսպիսի ազդեցություն է ունենում միայն ջուրը, այլ ոչ թե որևէ այլ խմիչք:

Դեւին նաև նշել է, որ չափից շատ հեղուկի օգտագործումը կարող է հանգեցնել ջրային թունավորման և նույնիսկ ավարտվել մահվան ելքով, ուստի նիհարելու ժամանակ պետք է հետևել ըմպած ջրի չափաքանակին:

Հետազոտությունների արդյունքները ներկայացվել են Ամերիկյան քիմիական միության (ACS) 240-րդ Ազգային համագումարի ժամանակ: