Երաժշտական միջազգային փառատոն` Երեւանում

«Երևանի ամառային երաժշտական փառատոն-2011»-ը կսկսվի օգոստոսի 26-ին և կավարտվի օգոստոսի 28-ին:

«Այսպիսի փառատոների միջոցով մենք ուզում ենք, որպեսզի Երևանը դառնա երաժշտական քաղաք, եւ հույս ունենք, որ այն կլինի շարունակական»,- լրագրողների հետ հանդիպման ժամանակ ասաց փառատոնի կազմակերպիչ Վարդան Գրիգորյանը:

Միջոցառմանը կմասնակցեն 12 խմբեր` Գերմանիայից, Իտալիայից, ԱՄՆ-ից, Վրաստանից, ինչպես նաև Հայաստանի ռոք և ջազ-ռոք խմբերը`«Բամբիռ», «Դոգմա» եւ այլն:

Փառատոնը կանցկացվի Ազատության հրապարակում: Ամեն օր ելույթ կունենա 4 խումբ` ժամը 19:00-ից սկսած, իսկ ցերեկային ժամերին ամբողջ տարածքը կվերածվի հանգստի գոտու, որտեղ մարդիկ իրենց հանգիստը կվայելեն բարձրաճաշակ երաժշտության ներքո, հնարավորություն կունենան հետևելու երաժիշտների փորձերին: