Ռուսաստանն Իրանին նոր առաջարկներ է արել

Ռուսաստանն Իրանին առաջարկել է նոր ատոմակայաններ կառուցել, բացի արդեն կառուցված, սակայն դեռ շահագործման չհանձնված Բուշերի ԱԷԿ-ից: Երեկ այդ մասին, ըստ mignews.com-ի, հայտարարել է Իրանի Ատոմային էներգիայի կազմակերպության ղեկավար Ֆերիդուն Աբասի-Դավանին:

Նրա խոսքերով` կողմերը բանակցություններ են վարել, որոնց արդյունքներով Մոսկվան Թեհրանին մի շարք առաջարկներ է արել: «Ապագա նախագծերը կիրականացվեն այնպես, որ երկու երկրների շահերն էլ պաշտպանվեն»,- նշել է Աբասի-Դավանին` չմանրամասնելով, թե ատոմակայանները քանիսն են լինելու եւ կոնկրետ որտեղ են կառուցվելու:

Նշենք, որ Բուշերի ատոմակայանի գործարկման արարողությունը դարձյալ հետաձգվել է` մինչեւ 2011-ի նոյեմբերը կամ դեկտեմբերի սկիզբը: Դա առաջացրել է իրանական կողմի դժգոհությունը: