ԱՌԱՎՈՏ. Ինչո՞վ էր "Ա1+"-ի փաթեթը տարբերվում մյուս TV-ների հայտերից

«Առավոտն» արդեն հաղորդել է, որ Լոնդոնում տեղակայված ARTICLE 19 իրավապաշտպան կազմակերպությունը, որի նպատակը ողջ աշխարհում խոսքի ազատության իրավունքի պաշտպանությունն ու աջակցությունն է` հուլիսի 13-ին փորձագիտական վերլուծություն է տրամադրել Հայաստանում լիցենզավորման մրցույթների արդյունքներին նվիրված ԵՄԱ զեկույցի վերաբերյալ:

Եվ այս վերլուծության «ՀՌԱՀ գործելակերպը» ենթաբաժնում եզրակացնելուց հետո, որ մրցույթի մասնակից «ոչ մի ընկերություն չի ներկայացրել ֆինանսական պատշաճ հաշվարկներ եւ իրենց ֆինանսական վիճակի իրատեսական կանխատեսումներ` ARTICLE 19-ը զարմանալի է համարել, որ «Մելտեքս» ՍՊԸ-ի ներկայացրած փաթեթը մերժվել է այն եզրակացությամբ, որ «անհրաժեշտ ֆինանսական միջոցների մատչելիությունը հավաստող փաստաթղթերի զգալի մասը կեղծված եւ անհիմն է»:

Վերլուծության մեջ անթաքույց հեգնանք կա. «Զարմանալի կլիներ տեսնել, թե ինչպես է հաջողակ դիմորդների կողմից տրամադրված չհիմնավորված տեղեկատվությունը տարբերվել «Մելտեքս»-ի տրամադրվածից»: