Ազարյանը խոստովանեց. կեղծիքներ եղել են

Երեկ երրորդ անգամ Կենտրոնական ընտրական հանձնաժողովի նախագահ ընտրված Գարեգին Ազարյանն այսօր հանդիպեց լրագրողների հետ, բայց, ինչպեսեւ սպասվում էր, շատ հարցեր կա'մ անպատասխան մնացին, կա'մ սպառիչ պատասխաններ չստացան:

Շուրջ 15 րոպե ձանձրալի տոնով Ազարյանը խոսում էր ԿԸՀ առաջիկա անելիքների ու նորությունների մասին, որոնց համար «կռվել է արդեն 3 տարի»: Իսկ երբ հերթը հասավ լրագրողների «անցանկալի» հարցերին, Ազարյանը սկսեց դեսուդեն ընկնել:

Ո՞վ է մեղավոր, որ Հայաստանում մշտապես կեղծվում են ընտրությունները: «Ընտրությունների ժամանակ կեղծիքներ լինում են, բայց կեղծիքների համար մեղավոր են բոլորը` սկսած ԿԸՀ նախագահից մինչեւ ընտրողը»,- ասաց նա եւ հավելեց, որ ԿԸՀ-ն ընդամենը կազմակերպում է ընտրությունները և որևէ կապ չունի քաղաքական որոշումների ընդունման հետ:

Այնուհետեւ հետեւեցին լրագրողների մյուս հարցերը` կապված կեղծված ընտրությունների, ԿԸՀ-ի եւ անձամբ իր նկատմամբ հասարակության անվստահության վերաբերյալ: Ազարյանը չհերքեց, որ մարդիկ իրեն չեն վստահում, բայցեւ ասաց, որ ընտրությունների գործընթացի վերահսկողությունը ոչ միայն ԿԸՀ-ի, այլեւ ամբողջ հասարակության խնդիրն է: «Ընտրողին պետք է բացատրել, որ քվեաթերթիկի արժեքը ոչ թե 5 հազար դրամ է, այլ քվեաթերթիկը գին չունի»,- հայտարարեց նա: