Վերջին հույսը, որ հրապարակը կփրկվի

Ալեքսանդր Թամանյանի հեղինակած Կառավարական շենքի անավարտ հատվածի` թմբուկի կառուցման հարցը շարունակում է բազմաթիվ կարծիքների տեղիք տալ: Հանրային մեծ հետաքրքրություն ներկայացնող այս հարցի առնչությամբ «Երկիր»-ը զրուցեց ճարտարապետ Լեւոն Իգիթյանի հետ:

«Մնացել է վերջին հույսը, որ հրապարակը կփրկենք»,- ասաց նա: Ճարտարապետի խոսքով` թմբուկի կառուցումն անհրաժեշտություն է:

«Սա քաղաքի կենտրոնում քաղաքաշինական վիճակը փրկելու վերջին շանսն է, որ հետագայում այն հեռանկար ունենա»,- նշեց նա` հավելելով, որ Թամանյանից հետո ամբողջ գաղափարը փչացրել են, եւ եթե դա էլ չարվի, հրապարակի վրա կարող ենք խաչ քաշել:

«Ժամանակին այն Եվրոպայի լավագույն հրապարակներից էր, բայց երբ պատկերասրահի շենքը կառուցեցին, առանցքը փչացրին, իր ճարտարապետական հորինվածքով, կերպարով մեր ազգի ճարտարապետության հետ ոչ մի կապ չունեցող մի շինություն ստեղծեցին»,- նշեց Լեւոն Իգիթյանը:

Ըստ նրա` այնուհետեւ մեր հրապարակի կողքին մի արհեստական հրապարակ ստեղծվեց` մետրոյի կայանը, որը դարձյալ վնաս հասցրեց թամանյանական գաղափարին, արտաքին գործերի նախարարության շենքի շարունակությունը չիրականացվեց, եւ այս շարքը կարելի է շարունակել: