Խորվաթիային դեռ եվրաընտանիք չեն ընդունում

Եվրամիությունն այսօր հայտարարել է, որ Խորվաթիայի անդամակցության հարցը դեռեւս վաղ է լուծված համարել:

Խորվաթիան մտադիր է եվրաընտանիքին միանալ 2013 թվականին, սակայն ԵՄ որոշ պետություններ այնքան էլ համոզված չեն, որ հակակոռուպցիոն բարեփոխումներն այդ երկրում հաջող են ավարտվել:

Մեծ Բրիտանիայի արտգործնախարար Ուիլյամ Հեյգը հայտարարել է, որ Լոնդոնը սպասում է այդ թեմայով ԵՄ հատուկ զեկույցին: «Մենք կողմ են Խորվաթիայի անդամակցությանը, սակայն հարկավոր է անցնել բոլոր ընթացակարգերը»,- նշել է նա:

Իսկ Ավստրիայի արտգործնախարար Միխայել Շպինդլեգերի կարծիքով` Խորվաթիան բազմաթիվ դրական քայլեր է կատարել, եւ ժամանակն է դադարեցնել բանակցություններն ու սկսել վավերացման գործընթացը: Նա դժգոհություն է հայտնել այդ երկրի հակակոռուպցիոն առաջընթացի մոնիտորինգ իրականացնելու գաղափարի կապակցությամբ:

Այսօրվա հանդիպման ժամանակ ԵՄ երկրների արտգործնախարարները կորոշեն նաեւ Խորավաթիայի հետ բանակցությունների շարունակման օրը:

ԵՄ-ն զգուշավորությամբ է վերաբերվում հակակոռուպցիոն  գործընթացների հաջող լինելու մասին հայտարարություններին այն բանից հետո, երբ 2007-ին ԵՄ անդամ դարձած Ռումինիայում եւ Բուլղարիայում այդ գործընթացները զգալի հետընթաց ապրեցին: