Օպերային թատրոնում լուրջ չեն ընդունում «Նորմա»-ի վերաբերյալ` Բորիս Հայրապետյանի բողոքները

Մայիսին Ալ. Սպենդիարյանի անվան օպերայի և բալետի ազգային ակադեմիական թատրոնում տեղի ունեցավ Բելինիի «Նորմա» օպերայի վերականգնված պրեմիերան: Ներկայացման ռեժիսորը Բորիս Հայրապետյանն էր, ով, սակայն, դժգոհ էր մնացել ներկայացման որակից և նամակով դիմել էր մշակույթի նախարարին, որ ներկայացումը հանեն խաղացանկից:

Այսօր Ալ. Սպենդիարյանի անվան օպերայի և բալետի ազգային ակադեմիական թատրոնի տնօրեն Անդրանիկ Արզումանյանը լրագրողներին ասաց, թե դա երևի մարդու տեսակ է, որ միշտ դժգոհում են ինչ-որ բանից, սակայն լավ կլինի, դժգոհելուն զուգահեռ, փորձեն նաև սխալները շտկել: Ըստ նրա` իրենք լուրջ չեն ընդունում Հայրապետյանի բողոքները:

«Յուրաքանչյուր ներկայացում էլ ունենում է թերություններ, որոնք ռեժիսորի հետ աշխատելու արդյունքում շտկվում են, և դա աշխատանքային նորմալ պրոցես է: Հայրապետյանի բողոքները սև փիար ենք համարում, որն աշխատեց ներկայացման օգտին, քանի որ տոմսերի վաճառքն ավելացել էր: Ռեժիսորը, որը բեմադրեց օպերան, այդ օրվանից նրան չենք տեսել թատրոնում, և նա միայն բողոքում է: Կարծում եմ` կարիք չկար «Նորմա»-ի շուրջ այդքան աղմուկ բարձրացնել»,- ասաց Արզումանյանը:

Նա, այնուամենայնիվ, նշեց նաև, որ թատրոնի դռները բաց են Հայրապետյանի առջև, և եթե նա կցանկանա, կարող է գալ և աշխատել թիմի հետ: