Պայքար` քաղաքն աղտոտողների դեմ

Մայիսի 21-ին մայրաքաղաքում համաքաղաքային շաբաթօրյակ է անցկացվելու:

Այսօր աշխատանքային խորհրդակցության ժամանակ Երևանի քաղաքապետ Կարեն Կարապետյանը աշխատակազմի համապատասխան կառույցներին և վարչական շրջանների ղեկավարներին հանձնարարել է ապահովել համատիրությունների ու բնակիչների ակտիվ մասնակցությունը շաբաթօրյակին:

Ըստ նրա` շաբաթօրյակը միայն թափված թղթերն ու պոլիէթիլենային տոպրակները հավաքելը չէ, այլ նաեւ` տարածքների բարեկարգումն ու կանաչապատումը:

Անդրադառնալով աղբահանության կազմակերպմանը` քաղաքապետը դարձյալ շեշտել է, որ մաքուր և բարեկարգ մայրաքաղաք ունենալու գործում շատ կարևոր է յուրաքանչյուր քաղաքացու հոգատար վերաբերմունքը քաղաքի նկատմամբ: Նա առաջարկել է անհանդուրժողականություն քարոզել քաղաքն աղտոտողների նկատմամբ. տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը: