ՀՀԿ-ն ձգտում է իշխանության

ՀՅԴ խմբակցության պատգամավոր Լիլիթ Գալստյանը Հայաստանի ներքաղաքական իրավիճակը լարված է գնահատում:

«Քաղաքականության եւ տնտեսության ոլորտներում արձանագրված ձախողումները, ազգային անվտանգությանը սպառնացող արտագաղթի ալիքը, գնաճը, դատական համակարգի անկատարությունը հաստատում են, որ Հայաստանը շարունակում է մնալ մարդու իրավունքները խաթարող եւ չհարգող երկիր»,- հայտարարեց Լիլիթ Գալստյանը` ավելացնելով, որ «Հազարամյակի մարտահրավերներ» ծրագրի դադարեցումը ապտակ էր Հայաստանի կառավարման համակարգին:

Լիլիթ Գալստյանի ներկայացրած թվերից հետո Մանվել Բադեյանն ասաց. «Այս ամենից հետո կարելի է գնալ միայն գերեզմանոց: Այսինքն` այնքան վատ է, որ սրանից վատ էլ չի կարող լինել: ՀՀԿ-ն, ինչպես ցանկացած ուրիշ կուսակցություն, ձգտում է իշխանության»,- արձագանքեց հանրապետական պատգամավորը` նշելով, որ, ընդդմության մեղադրանքները լսելով, տպավորություն է ստեղծվում, թե իշխանությունը երկիրը դիտմամբ է տանում դեպի կործանում:

Մանվել Բադեյանը նշեց նաեւ, որ իրենք գիտակցում են, որ իրականացվող բարեփոխումների տեմպն ու որակը պետք է լավացնել: