Թուրքերը պասիվ են այս տարի

Նախորդ տարի այս օրերին թուրքական կողմը տարբեր պատվիրակություններ էր ուղարկում ԱՄՆ` կանխելու համար Հայոց ցեղասապանության առնչությամբ արվելիք պոտենցիալ քայլերը:

Այսօր լրագրողների հետ հանդիպմանը թուրքագետ Հակոբ Չաքրյանն ասաց, որ այս տարի թուրքերն ավելի պասիվ են աշխատում այս ուղղությամբ, եւ որքան իրեն է հայտնի, թուրքական դիվանագիտական պատվիրակություններ ԱՄՆ չեն այցելել:

Արդյո՞ք Օբաման կարտասանի «Ցեղասպանություն» բառը, հայտնի չէ: Սակայն, ինչպես նշեց Հ. Չաքրյանը, եթե չարտասանի էլ, ապա իրականում շատ բան չի փոխվի եւ այս տարի իրավիճակն ավելի հանգիստ է, քան նախորդ տարի էր` կապված թուրք-հայկական արձանգրությունների ակտիվ փուլում լինելու հետ:

Հ. Չաքրյանը նշեց նաեւ, որ եթե Օբաման արտասանի այդ բառը, ապա Ցեղասպանության ճանաչման գործընթացն ավելի կհեշտանա:

Առհասարակ, թուրքագետին մտահոգում է ավելի շատ ոչ թե Օբամայի արտասանել-չարտասանելը, որքան Սփյուռքի ոչ համարժեք արձագանքը դրան, ինչպես եղավ Նենսի Փելոսիի դեպքում, չպասված վարքագծի դեպքում նրան դավաճան որակեցին:

Հ. Չաքրյանի խոսքերով, եթե նույնիսկ Օբաման չօգտագործի հենց ցեղասապանություն տերմինը, այնուամենայնիվ նրա` ապրիլի քսանչորսին ունեցած ելույթն ավելի մեծ նշանակություն ունի, քան մի շարք ոչ հայտնի եւ փոքր պետությունների կողմից Ցեղասպանության ճանաչումը: