"Ալեքս Գրիգ"-ի նկատմամբ վարչական վարույթ է հարուցվել

Տնտեսական մրցակցության պաշտպանության պետական հանձնաժողովի (ՏՄՊՊՀ) կողմից մանրածախ առեւտրի կետերում կատարվող ամենօրյա դիտանցումների արդյունքում արձանագրվել է, որ վերջին շրջանում կարագի եւ բուսական յուղի շուկաներում նկատվում են գնային փոփոխություններ:

Հիմք ընդունելով հանձնաժողովի մոնիտորինգի խմբի վերլուծությունները, ինչպես նաեւ թեմայի վերաբերյալ տարբեր լրատվամիջոցների հրապարակումները` այսօր կայացած նիստում հանձնաժողովը որոշել է վարչական վարույթ հարուցել այդ շուկաներում գերիշխող «Ալեքս Գրիգ» ընկերության նկատմամբ:

Օրենքով սահմանված ժամկետում «Ալեքս Գրիգը» հանձնաժողովին պետք է ներկայացնի տեղեկատվություն իր կողմից իրացվող կարագի եւ բուսական յուղի ձեռքբերման ու իրացման գների վերաբերյալ: 5-օրյա ժամկետում ընկերությունը պետք է ներկայացնի նաեւ թանկացման հիմնավորումները:

Հանձնաժողովը տեղեկատվություն է պահանջել նաեւ վերը նշված շուկաներում գործող մյուս տնտեսվարողներից` պարզելու` կա՞ն, արդյոք, կառուցվածքային փոփոխություններ, մասնավորապես` այլ խոշոր տնտեսվարողներ, թե՞ ոչ: