Արտառոց ոչինչ չկար

ԵԽԽՎ-ում Հայաստանի հարցով համազեկուցողներ Ջոն Պրեսկոտի եւ Աքսել Ֆիշերի` ապրիլի 15-ին արված հայտարարությունը ո'չ արտառոց, ո'չ էլ անսպասելի գնահատականներ չէր պարունակում. այսօր լրագրողների հետ հանդիպման ժամանակ ասացին ԵԽԽՎ հայաստանյան պատվիրակության ղեկավար Դավիթ Հարությունյանը եւ պատվիրակության անդամ Նաիրա Զոհրաբյանը:

Ֆիշերը եւ Պրեսկոտը այդ հայտարարությամբ կոչ էին անում Հայաստանին` ընտրական, դատական եւ ոստիկանական համակարգերում բարեփոխումներ կատարելու նախաձեռնությունները վերածել գործողությունների:

Հայտարարության մեջ նշվում էր նաեւ, որ մարտիմեկյան դեպքերի առթիվ ձերբակալությունների եւ 10 հոգու մահվան պատճառների պատշաճ հետաքննության բացակայությունը թունավորում է Հայաստանի քաղաքական միջավայրը եւ բացասական ազդեցություն կունենա առաջիկա ընտրությունների վրա:

Մարտիմեկյան դեպքերի բացահայտման եւ ձերբակալվածների ազատ արձակման պահանջների վերաբերյալ Դավիթ Հարությունյանը նշեց, որ երկրում բարեփոխումների անցկացումը եւ այդ պահանջների կատարումը բխում է Հայաստանի օրենսդրությունից, ինչպեսեւ պետության շահերից, եւ այդ ուղղությամբ քայլեր ձեռնարկվում են: