ԿՀՎ-ն կգլխավորի գեներալ Պետրեուսը

ԱՄՆ գլխավոր հետախուզական ծառայությունը (ԿՀՎ) շուտով հնարավոր է գլխավորի ներկայումս Աֆղանստանում ՆԱՏՕ-ի կոալիցիոն ուժերի հրամանատար, գեներալ Դեւիդ Պետրեուսը:

Այս մասին լրագրողներին հայտնել են մի քանի բարձրաստիճան աղբյուրներ, այդ թվում՝ կառավարական պաշտոնյաներ:

Ըստ նույն աղբյուրների՝ ԿՀՎ տնօրեն Լեոն Պանատի թեկնածությունը դիտարկում են ԱՄՆ պաշտպանության գործող նախարար Ռոբերտ Գեյթսին փոխարինելու համար:

Պենտագոնի ղեկավարը, որն այդ պաշտոնում նշանակվել է դեռ Բուշ կրտսերի օրոք, նախատեսել էր պաշտոնաթող լինել անցյալ տարի, սակայն 2010-ի օգոստոսին գեներալը որոշեց պաշտոնավարել մինչեւ ամերիկյան զորքերի` Աֆղանստանից դուրսբերումը, որը նախատեսված է ընթացիկ տարվա հուլիսին:

Պաշտպանության նախարարի պաշտոնում հարմար էին տեսնում ԱՄՆ պետքարտուղար Հիլարի Քլինթոնին, սակայն վերջինս լրագրողների հետ զրույցում հայտնել է, թե մտադիր չէ հավակնել այդ պաշտոնին:

Պետրեուսը լայնորեն համագործակցել է ԿՀՎ-ի հետ, երբ հրամանատար էր Իրաքում ու Աֆղանստանում, որոշ տվյալներով` նա մասնակցել է գերատեսչության՝ Պակիստանում իրականացրած հատուկ գործողություններին:

Կենտրոնական հետախուզական վարչության գոյության 60 տարիների ընթացքում այն բազմիցս գլխավորել են պաշտոնաթող գեներալներ ու ծովակալներ: