Ինչո՞ւ եք հագել Սերժ Սարգսյանի կոստյումը, դրանից 2 կոճակ պոկել և ասում եք՝ լավ կոստյում է. Մարուքյանը՝ կառավարության կառուցվածքի փոփոխության մասին

«Ձեր ներկայացրած համակարգը Սերժ Սարգսյանի համակարգն է: Կոստյումից երկու կոճակ եք հանել, հենց գիտեք, թե բան եք փոխել: Այդ երկու կոճակը հանելով՝ վարչապետը մնացել է ԱԱԾ պետը, ոստիկանության պետը, ՊԵԿ-ի պետը: Չկա միջանկյալ քաղաքական օղակ, որը պատասխանատվություն կկրի նշված մարմինների համար»,- պնդեց պատգամավորը:

Ասելիքն ավելի պատկերավոր դարձնելու համար «Լուսավոր Հայաստան» խմբակցության ղեկավարն իր հետ  պաստառներ էր բերել, որոնցով բացատրում էր «Իմ քայլը» խմբակցության պատգամավորներին, որ կառավարության ներկայացրած նախագիծը սխալ է:

«Սա ձեր ներկայացրած համակարգն է. դուք առաջարկում եք 12 նախարարություն և երկու փոխվարչապետ: Մենք առաջարկել ենք երեք փոխվարչապետ, 14 նախարարություն: Այս հատվածը, որ մի շարք նախարարություններից ավելին արժե, մնացել է խորհրդարանական վերահսկողությունից դուրս: Այս համակարգը քաոս է,  խայտառակ համակարգ է: Սա չի երկարելու, դուք հետ եք գալու` սա փոխելու, բայց ուշ է լինելու»,- շեշտեց Մարուքյանը և ցույց տվեց հաջորդ պաստառը, որում պատկերված էր իրենց առաջարկած` հասկանալի և խորհրդարանական կառավարման երկրին հարիր համակարգը` 3 փոխվարչապետով:

«Այսինքն՝ մենք մեկ փոխվարչապետին առաջարկում ենք պահել որպես Սփյուռքի և հայրենադարձության  հարցերով զբաղվող` բարձր մակարդակ ենք ապահովում, իսկ նախարարությունների թիվը դառնում է 14: Մենք ռեկորդ չենք ուզեցել խփել` ինչքան հնարավոր է շատ կրճատել: Պահպանում ենք մշակույթի նախարարությունը, որովհետև հայ ազգը մշակութային պատերազմի մեջ է: Պահպանում ենք գյուղատնտեսության նախարարությունը, որովհետև մենք ինստիտուցիոնալ զարգացած պետություն չունենք, որ գյուղացիական տնտեսությունները զարգանան առանց գյուղնախարարության աջակցության, որը ՀՆԱ-ի 16 տոկոսն է ապահովում: Իսկ դուք համարում եք, որ ՀՆԱ-ի 16 տոկոսն ապահովող նախարարությունը մեզ պետք չէ: Սուպերնախարարություն ստեղծենք, մի մարդու վրա բարդենք ամեն ինչ, որ էդ մարդը գլուխ չհանի, մի վեց տեղակալ ունենա և չհասկանա, թե ինչ է անում»,- ասաց նա:

Մարուքյանի խոսքով՝ ԱԱԾ քննչական մարմինը պիտի դուրս գա ԱԱԾ-ից, այսինքն՝ իրենց առաջարկած նախարարության մեջ չի լինելու քննչական մարմին, այն պետք է տեղափոխվի քննչական կոմիտե:  Նույնը վերաբերում է ՊԵԿ քննչական դեպարտամենտին։

«Այն ժամանակ ԱԱԾ-ի պետը, ՊԵԿ-ի պետը գնացել են Սերժ Սարգսյանի մոտ և պահել են քննչական մարմինները: Կոնկրետ ՊԵԿ-ի պարագայում հարկատուն հարկը չի վճարել կամ սխալմունք է եղել, քրեական գործ են հարուցել հարկերից չարամտորեն խուսափելու համար: Չի վճարում, կալանավորում են, ասում են՝ դե նստի, մինչև փողերը չբերես, բաց չենք թողնի: Դա դարձել է հարկահավաքման միջոց: Հիմա Հայաստանում հեղափոխություն է եղել, հեղափոխության արդյունքում այդ արատավոր համակարգերը պետք է վերանայվեն, դառնան ժողովրդավարական, պետք է դրանք լինեն հաշվետու ՀՀ քաղաքացիներին, իսկ ՀՀ քաղաքացիներին կարող են լինել հաշվետու խորհրդարանի միջոցով, ինչն էլ առաջարկում է ԼՀԿ-ն: Ինչո՞ւ Նիկոլ Փաշինյանի խոստումը չեք կատարում, և ի՞նչն է պատճառը, որ հեղափոխությունից արդեն մեկ տարի անց դուք այդպես էլ չեք կողմնորոշվում, թե ինչպես է պետք մեր կառավարման համակարգը դարձնել բաց, ժողովրդավարական և հաշվետու: Ո՞րն է պատճառը, ինչո՞ւ եք հագել Սերժ Սարգսյանի կոստյումը,  ո՞ւմ է պատիվ բերում այդ կոստյումը հագնելը: Այդ պատասխաններն ենք մենք ակնկալում լսել այս քննարկման արդյունքում»,- ամփոփեց Մարուքյանը: