Սկզբունքային դրույթներում զիջել չեն պատրաստվում

Այսօր ԱԺ խմբակցությունները ներկայացրին իրենց տեսակետը ՀՅԴ-ի հեղինակած «ՀՀ Ընտրական օրենսգրքում փոփոխություններ եւ լրացումներ կատարելու մասին» օրենքի նախագծի վերաբերյալ:

ԱԺ փոխնախագահ, ԲՀԿ խմբակցության ղեկավար Սամվել Բալասանյանը կարեւորեց ընդդիմության հետ համաձայնության ձեռք բերումը` կրկնելով խորհրդարանական ընդդիմության բազմիցս կրկնած միտքը, թե նորմալ ընտրություններ անցկացնելու համար քաղաքական կամք է հարկավոր:

Ավելի հետաքրքիր էր ՀՀԿ խմբակցության ղեկավար Գալուստ Սահակյանի մտահոգությունը. «Բայց դուք ինձ` որպես ընտրող, հարցրե՞լ եք, ես ուզո՞ւմ եմ նկարահանման տակ ընտրությանը մասնակցել: Հիմա ես այդ օրը պետք է մտածեմ ինչ հագուստ հագնեմ: Եթե ես մտածում եմ, մյուսներն էլ են մտածում` ի՞նչ շոր հագնել ու գնալ ընտրության, որ նկարահանող տեսախցիկի տակ չընկնեմ ու հեռուստացույցով ցույց չտրվի: Սա ճնշում է ընտրողի նկատմամբ, միեւնույն ժամանակ, զգուշավոր է դարձնում նրանց, ովքեր փորձում են ընտրակեղծիքներով զբաղվել»:

Արդարադատության նախարար Հրայր Թովմասյանը, ով դեռ նախորդ օրն էր հայտարարել, որ կառավարությունը դեմ է հանդես եկել այս նախաձեռնությանը, նշեց, թե «եթե դեմ է արտահայտվել, դա չի նշանակում, որ մյուս նախագծում արտացոլված դրույթներն ընդհանրապես կյանքի իրավունք չունեն»:

ՀՅԴ խմբակցության ղեկավար Վահան Հովհաննիսյանն իր ելույթում նշեց, որ իրենք պատրաստ են համագործակցության, սակայն որոշ սկզբունքային դրույթներում, օրինակ` ընտացուցակների հրապարակման հարցում, զիջել չեն պատրաստվում: