ԿԱՊԻՏԱԼ. Կանանց դուրս են մղում թոփ մենեջերների պաշտոնից

Հայաստանում կանայք դուրս են մղվում թոփ մենեջերների պաշտոնից։ Կանայք ՀՀ-ում զբաղեցնում են ղեկավար պաշտոնների 23%-ը, իսկ նախորդ տարի այդ ցուցանիշը կազմում էր 29%:

«Գրանթ Թորնթոն Ինթերնեշնլի» 2011 թ. միջազգային գործարար զեկույցի համաձայն՝ ներկայումա ամբողջ աշխարհում կանայք զբաղեցնում են ղեկավար պաշտոնների 20%-ը, ինչը 24%-ով պակաս է 2009թ. և միայն 1%-ով է ավելի 2004թ. տվյալներից: «Գրանթ Թորնթոնի»՝ մասնավոր հատվածի ընկերությունների շրջանում յուրաքանչյուր եռամսյակ անցկացվող հետազոտությունը վկայում է նաև այն մասին, որ ղեկավար պաշտոններում կին չունեցող ընկերությունների թիվն աճել է մինչև 38%` 2009թ. 35%-ի համեմատ:

Ղեկավար պաշտոններում կանանց թվի վերաբերյալ կազմված աղյուսակը գլխավորում է Թաիլանդը (45%), որին հետևում են Վրաստանը (40%), Ռուսաստանը (36%), Հոնկոնգը և Ֆիլիպինները (երկուսն էլ՝ 35%): Ամենաստորին դիրքերում են Հնդկաստանը, Միացյալ Արաբական Էմիրությունները և Ճապոնիան, որտեղ կանայք զբաղեցնում են ղեկավար պաշտոնների 10%-ից ոչ ավելին:

Աշխարհի բոլոր երկրների տվյալներով՝ կին ղեկավարներ ունեցող ընկերությունների 22%-ում նրանք զբաղեցնում են ֆինանսական պաշտոններ (օրինակ՝ ֆինանսական տնօրենի): Հաջորդ ամենից շատ հանդիպող պաշտոններն են մարդկային ռեսուրսների ղեկավարը (20%), մարկետինգի պատասխանատուն և վաճառքի գծով տնօրենը (երկուսն էլ 9%):